Idman.biz
Almaniyanın "Bavariya" futbol komandasının baş məşqçisi Vensan Kompaninin səhhətində müsbət irəliləyiş qeydə alınıb.
İdman.Biz Niderlandın "VoetbalPrimeur" nəşrinə istinadən xəbər verir ki, bu barədə Münhen təmsilçisinin baş məşqçi vəzifəsini müvəqqəti icra edən Aaron Denks məlumat verib.
Mütəxəssis Almaniya Bundesliqasında "Maynts"la keçiriləcək səfər oyunundan əvvəl təşkil olunan mətbuat konfransında belçikalı çalışdırıcının vəziyyətinin yaxşılaşdığını bildirib.
"Son günlər onunla telefonla bir neçə çox yaxşı söhbətimiz olub. Əhvali-ruhiyyəsi yüksəkdir və görünür, tam sağalmağa doğru irəliləyir", - deyə Denks açıqlayıb.
Lakin o, 40 yaşlı mütəxəssisin işinə nə vaxt qayıdacağının hələ bilinmədiyini vurğulayıb.
"Hazırda onun qayıdışı üçün konkret tarix müəyyənləşdirməmişik. Milli komandaların oyunları ilə əlaqədar yaranacaq fasilə vəziyyəti qiymətləndirmək və nə vaxt geri dönə biləcəyini müəyyənləşdirmək üçün yaxşı fürsət olacaq", - deyə Denks əlavə edib.
Xatırladaq ki, Kompani oktyabrın 23-də məşq zamanı huşunu itirərək xəstəxanaya yerləşdirilib. Müayinələr zamanı onda beyin qişalarının qıcıqlanması aşkarlanıb. Belçikalı mütəxəssis ötən həftə xəstəxanadan buraxılıb və hazırda ev şəraitində sağalmasını davam etdirir.
"Bavariya" rəhbərliyi baş məşqçinin sağlamlığı ilə bağlı riskə getməyəcəyini və onun yalnız tam bərpa olunduqdan sonra vəzifəsinə qayıdacağını açıqlayıb.
Qeyd edək ki, "Bavariya" noyabrın 7-də Bundesliqanın növbəti turunda "Maynts"ın qonağı olacaq. Komandaya bu görüşdə də Aaron Denks rəhbərlik edəcək.
Xatırladaq ki, Kompaninin səhhətində problemlər 17 oktyabr 2026-cı ildə "Bavariya"nın "Leypsiq"i 6:1 hesabı ilə məğlub etdiyi Bundesliqa oyununda özünü göstərib. Həmin qarşılaşmada belçikalı mütəxəssis özünü pis hiss etdiyi üçün əsasən ehtiyat oyunçular skamyasında əyləşib. Oyundan sonra mətbuat konfransına da qatılmayıb. 23 oktyabr tarixində isə "Bavariya"nın ikinci komandasının məşqini izləyərkən huşunu itirib və xəstəxanaya yerləşdirilib.
