Idman.biz
"Barselona" mövsüm öncəsi ilk yoldaşlıq oyununda Yaponiyanın "Vissel Kobe" klubu ilə qarşılaşıb.
İdman.biz xəbər verir ki, matç kataloniyalıların 3:1 hesabı ilə başa çatıb.
Qarşılaşmada diqqət çəkən məqam İspaniya klubunun bu yay icarə əsasında "Mançester Yunayted"dən transfer etdiyi Markus Reşfordun debütü olub.
İlk hissədə Erik Qarsiya küncdən zərbədən hesabı açıb. Lakin Taisei Miyaşiro fasiləyə qədər bərabərliyi bərpa edib.
İkinci hissədə bir sıra əvəzetmələr olub. Hansi Flik yeni oyunçuları, o cümlədən Reşfordu, 19 yaşlı Runi Barjini və Robert Levandovskini meydana çıxarıb. Barji Reşfordun ötürməsini möhtəşəm zərbə ilə qola çevirib.
Matçın sonunda klubun yetirməsi olan 18 yaşlı Pedro Fernandez uzaq məsafədən güclü zərbə ilə üçüncü qolu vuraraq "Barselona"nın uğurunu təmin edib.
İdman.biz
