Idman.biz
"Barselona" Lamin Yamalın zədəsi ilə bağlı münaqişəni həll etmək üçün İspaniya Futbol Federasiyası (RFEF) ilə danışıqlar aparmaq niyyətindədir.
İdman.biz-in "Marca"ya istinadən verdiyi məlumata görə, "Barselona"nın baş məşqçisi Hansi Flikin İspaniya millisini açıq şəkildə tənqid etməsindən sonra klubun idman direktoru Deku RFEF-in texniki direktoru Aytor Karanka ilə görüşəcək.
Flik milli komandaya qasıq ağrısı ilə yollanan Yamalın Bolqarıstan və Türkiyə ilə oyunlarda meydançada xeyli müddət olmasını sərt şəkildə tənqid edib.
"Bu, futbolçuların qayğısına qalmaq deyil", deyən məşqçi oyuçunun ağrıkəsici ilə oynadığını vurğulayıb. Nəticədə Yamalın zədəsi kəskinləşib. 18 yaşlı vinger La Liqada "Valensiya" ilə matçı buraxıb və Çempionlar Liqasında "Nyukasl"la matçda iştirakı böyük sual altındadır.
"Barselona" gələcəkdə oxşar halların yaşanmaması üçün klubla milli komanda arasında ünsiyyət protokollarını təkmilləşdirməyi zəruri hesab edir. Deku və Karanka arasında danışıqlar futbolçuların, xüsusən də Yamal kimi gənc istedadların sağlamlığının qorunması üçün koordinasiyalı yanaşmanın yaradılmasına yönələcək.
İdman.biz
