Idman.biz
"Barselona" klubu Braziliyanın "Vasko da Qama" komandasında parlayan gənc vinger, 1,85 boyu, güclü fiziki quruluşu və mükəmməl texnikası olan Rayan Vitorla ciddi şəkildə maraqlanır.
İdman.Biz xəbər verir ki, jurnalist Ekrem Konurun məlumatına görə, katalon klubu Rayan üçün 25-30 milyon avro (təxminən 46-55 milyon AZN) dəyərində təklif hazırlayıb. Bu addımın səbəbi Avropanın bir çox klubunun artıq futbolçu ilə maraqlanmasıdır.
Rayan hazırda Braziliya futbolunun ən parlaq hücumçularından biridir. Onun çıxışı Premyer Liqa klublarının da diqqətini çəkib. "Roma"nın oyunçunun transferi üçün danışıqlar apardığı bildirilir, lakin hələlik konkret razılıq əldə olunmayıb. Buna baxmayaraq, "Barselona" yekun qərar üçün gözləməyə davam edir. Klub sağ mövqenin artıq kifayət qədər dolu olduğunu nəzərə alaraq belə yüksək məbləğli investisiyanın məntiqliliyini müzakirə edir.
Məlumata görə, Rayanı "Barselona"nın idman direktoru Dekonun uzun illərdir izləməsi də məsələyə təsir edir. Deko onun istedadını hələ "Barça"ya gəlməzdən əvvəl kəşf etmiş, agent kimi fəaliyyət göstərdiyi dövrdən oyunçunu yaxından izləyirmiş. Katalon klubu Braziliya bazarında riskləri yaxşı bilir, xüsusilə Vitor Roque əməliyyatının uğursuzluğu hələ də müzakirə olunur. Maraqlıdır ki, klub daha əvvəl Estevanı almaqdan imtina etmişdi, halbuki o, bu gün "Çelsi"də parlayır.
Bütün bunlara rəğmən, "Barselona" Rayan üçün gələcəkdə təqdim ediləcək rəsmi danışıqlarda güclü mövqedə ola bilər. Futbolçunun menecerinin "Barselona"ya yaxın olması da əməliyyatın mümkünlüyünü artırır. Klubda əldə olunan daxili hesabatlar müsbətdir və Rayanın adı artıq masadadır. Lakin yekun qərar qış və ya yay pəncərəsi zamanı klubun maliyyə imkanlarından asılı olacaq.
Qeyd edək ki, Rayan yaxınlarda "Vasko da Qama" ilə müqaviləsini 2028-ci ilə qədər uzadıb. Bununla klub onun satışına yalnız yüksək məbləğ qarşılığında razılaşacağını göstərir. Futbolçunun hazırkı bazar dəyəri təxminən 18 milyon avro (təxminən 33 milyon AZN) olsa da, Braziliya klubu onu 25 milyon avrodan (təxminən 46 milyon AZN) aşağı məbləğə satmayacaq. "Barselona" isə hələlik düşünməkdədir.
Qeyd edək ki, "Beşiktaş" klubu may ayında Rayan üçün "Vasko da Qama"ya 7 milyon avro (13 ) təklif etmişdi. Qarşı tərəf isə transfer dəyərinin 15 milyon avro (28 milyon AZN) olduğunu açıqlamışdı.
