Sport24.az
Almaniyanın "Borussiya Dortmund" klubunda çıxış edən Niko Şlotterbekin adı "Barselona"nın müdafiə xətti üçün mümkün seçim kimi gündəmdə qalır. Sport24.az xəbər verir ki, "Sky Sport Germany" jurnalisti Patrik Berqerin məlumatına görə, katalon klubunun futbolçuya marağı mövcuddur, lakin Şlotterbek üçün "Barselona"ya keçid yaxın perspektivdə prioritet sayılmır.
Klub rəhbərliyində də müdafiəçi ilə bağlı tam fikir birliyi yaranmayıb, bəzi idarəçilər onun uyğunluğu barədə tərəddüd edir.
Məlumata görə, Hansi Fliklə Niko Şlotterbek arasında münasibətlər yaxşı olsa da, alman mütəxəssis transferin reallaşması üçün xüsusi israr göstərmir. Bununla belə, "Barselona"nın müdafiə xəttində güclənməyə ehtiyacı olduğu vurğulanır.
Katalon klubunun qış və ya yay transfer dönəmində digər müdafiə variantlarını da nəzərdən keçirdiyi bildirilir.
