Idman.biz
Hazırda İspaniyanın "Barselona" klubunda çıxış edən 18 yaşlı Mark Bernalın adı 18 noyabrda Fələstin yığması ilə keçiriləcək yoldaşlıq görüşü ilə bağlı gündəmə gəlib.
İdman.Biz xəbər verir ki, "Barselona" rəhbərliyi gənc futbolçunun bərpa prosesini ehtiyatla idarə edir və ona oyun praktikası qazandırmaq üçün bu görüşdə iştirakını məqsədəuyğun sayır. Bernalın qarşılaşmada ilk 45 dəqiqə meydanda olması planlaşdırılıb.
Yarımmüdafiəçi uzunmüddətli diz zədəsini sağaltdıqdan sonra cəmi beş matçda ümumilikdə 32 dəqiqə oyun təcrübəsi qazanıb. O, son dəfə "Valensiya"ya qarşı 6:0 hesablı görüşün son dəqiqələrində meydana daxil olub.
Mark Bernal La Masia yetirməsidir və Kataloniyanın Berqa şəhərində doğulub. Futbolçu fiziki gücü, topa nəzarət qabiliyyəti və oyunu oxuma bacarığı ilə seçilir.
Qeyd edək ki, bu qarşılaşmada özünü yaxşı tərəfdən göstərmək Bernala 22 noyabrda "Atletik Bilbao"ya qarşı keçiriləcək La Liqa oyununda heyətə düşmək imkanı yarada bilər.
