Idman.biz
"Barselona" 18 yaşlı hücumçu Lamin Yamalın karyerasını "El Klasiko" ətrafında yaranmış son gərginlik səbəbindən daha yaxından izləmək qərarına gəlib.
Bu barədə İdman.Biz Sport.es-ə istinadən məlumat verir.
Mənbənin məlumatına görə, klub oyunçuya futbolla əlaqəsi olmayan, yeni mobil telefon seriyasının təqdimatı ilə bağlı tədbirdə iştirakını ləğv etməyi məsləhət görüb. Yamalın "Barselona"nın tövsiyəsi ilə razılaşdığı vurğulanır.
Bundan əlavə, ötən həftə Yamal strimer AmineMaTue tərəfindən çəkilmiş videoçarxda görünüb. Lakin "göy-qırmızılar" videonu yayımlamaqdan çəkinmək və strimerlə çərşənbə axşamına planlaşdırılan müsahibəni ləğv etmək qərarına gəlib.
Xatırladaq ki, "El Klasiko"dan əvvəl 18 yaşlı futbolçu İspaniya media futbol turniri Kral Liqasından olan "Porsinos" komandasının "Real Madrid"ə bənzəyib-bənzəmədiyi soruşulduqda, "Bəli, əlbəttə. Onlar fırıldaq işlədir və şikayət edirlər" cavabını verib. Yamalın bu açıqlaması İspaniyanın futbol ictimaiyyəti arasında qalmaqallara səbəb olub. Nəticədə "Barselona" Yamalın hərəkətlərinə çəki-düzən verməsi üçün onun hər addımını izləmək qərarına gəlib.
