Idman.biz
I Liqanın XXIII turundan sonra Misli Premyer Liqasına vəsiqə qazanan bütün komandalar bəlli olub.
İdman.biz xəbər verir ki, "Qəbələ"nin ardından "İmişli" və "Karvan" da ilk "üçlük"də yerlərini təmin ediblər.
İdman prinsipləri ilə Premyer Liqada oynamaq hüququ qazanan klublar bunu tam rəsmiləşdirməyiblər. Çünki qarşıda klubları lisenziyalaşmadan uğurla keçmək kimi çətin vəzifə gözləyir. Bu il klublara müəyyən güzəştlər vəd olunsa da, hələ heç nə dəqiqləşməyib. Amma əgər idman prinsipləri ilə qazanılan vəsiqələr elitaya çıxmaqla nəticələnsə...
İmişlinin 3-cü komandası
"İmişli" bəziləri üçün əvvəlki klubların davamçısı sayılsa da, rəsmi sənədlərdə 2022-ci ildə yaradılıb. Bu, o deməkdir ki, klub Premyer Liqada debüt edəcək. Şəhərin indiyədək iki komandası elitada oynayıb. "Lokomotiv" və "MKT-Araz"dan sorna İmişli 3-cü klubla Premyer Liqada təmsil oluna biləcək.
15 mövsümdən sonra
"Karvan" isə daha yaşlı klubdur. Bir müddət hətta fəaliyyətini dayandıran komanda 2004-10-cu illərdə Premyer Liqada oynayıb. Həmin illərdə bir gümüş və bir bürünc qazanan Yevlax təmsilçisi 15 mövsüm elitadan kənarda qalıb. Əgər "Karvan" elitaya qayıtsa, Azərbaycan futbolu tarixinə ən uzun fasilədən sonra geri dönən komanda olacaq.
Şərikli rekord
İndiyədək rekord "Araz-Naxçivan"la "Göyəzən"ə məxsus idi. Qazax təmsilçisi 1992-ci ildə oynadığı ilk çempionatın güclülər dəstəsinə bir də 13-cü mövsümdə - 2004/05-ci illərdə qatılıb. "Araz-Naxçıvan" isə 11-ci çempionatda elitanı tərk edib və 23-cüdə qayıdıb. Amma 2001/02 mövsümündən sonra 2014/15-i gözləyən Naxçıvan həsrətdən sonra döndükləri yarışı sona da çatdıra bilməyiblər.
Beşillik plan
Tarixdə 3 dəfə bir komandaya Premyer Liqaya dönüş üçün 5 mövsüm lazım gəlib. 1998/99 mövsümündə Qusar "Şahdağ"ı, 2010/11 və 2022/23 mövsümlərinin ikisində də "Kəpəz" 5 illik həsrətə qayıdışla son qoyublar. "Karvan"ın bu dəfəki dönüşü isə həmin uç seriyanın cəminə bərabərdir.
Qeyd edək ki, "Qəbələ" cəmi bir mövsümdən sonra Premyer Liqaya qayıtmağı bir neçə tur əvvəl təmin edib.
Vüqar Xeyrullayev
İdman.biz
