Azərbaycan yığmasının keçmiş kapitanı: "Vitali Borisov nə eləsin, haradan futzalçı axtarsın?"

Vitali Borisov nə etsin, haradan futzalçı tapsın?

Bunu "Report"a açıqlamasında Azərbaycan futzal millisinin sabiq kapitanı Ağatahir Əzimov deyib.

Mütəxəssis Vitali Borisovun baş məşqçisi olduğu komandanın Avropa çempionatının əsas mərhələsində çıxışını dəyərləndirib:

"Düşünürəm ki, məşqçilik heç nə yoxdur. Braziliyalılar getdikdən sonra belə turnirlərdə oynaya biləcək futzalçılarımızın sayı azalıb. Bu gün heyətdə yer alanların bəzilərinin yaşı 40-dan yuxarıdır. Qalanları da çox gəncdirlər, 21-22 yaşları var. Yəni, bu gün meydana çıxıb sözünü deməli olan ortayaşlı nəsil yoxdur. Gənclər təcrübəsizdirlər, yaşlılar isə fizki cəhətdən çatdıra bilmirlər. Bunun da əsas səbəbi əvvəlki baş məşqçi Joze Alesio da Silvanın vaxtilə azərbaycanlılara oynamaq üçün çox şans yaratmamasıdır. Həmçinin əksər oyunçular futzalda sponsor olmadığı üçün minifutbola yönəldilər. Futzal çempionatımız da zəifdir. Vitali Borisov nə etsin, haradan futzalçı tapsın? Xaricdə oynayan legionerimiz də yoxdur ki, heyətə cəlb etsinlər".

O, komanda üzvlərinin təcrübəsizliyini qabardıb:

"Hazırda millinin heyətində olan gənc futzalçılar bir neçə il əvvəl U-19-da oynayırdılar. Yəni, təcrübəli deyillər, cəmi 2-3 ildir futzaldadırlar. Əlbəttə, belə oyunlarda çıxış etdikcə "artıracaqlar". Futzala sponsorlar cəlb olunsa, minifutbola yönələnlərin hamısı qayıdacaqlar. Əlavə bir neçə legioner gətirdikdən sonra çempionatımız daha da güclənər. Nəticədə gənc futzalçılar inkişaf edərlər. Hazırda çempionluq uğrunda "Araz-Naxçıvan", "Baku Fire" və "Neftçi" İK klubları mübarizə aparır. Qalan komandalar onlarla müqayisədə zəifdirlər. Rəqabət olmayan çempionatda gənclər inkişaf edə bilməz".

A.Əzimov komandanın çətinlik çəkdiyi əsas məqamları vurğulayıb:

"Deyə bilmərəm ki, meydana çıxıb döyüşmürlər. Bacardıqlarını ortaya qoyurlar. Taktiki tapşırıqları da yerinə yetirməyə çalışırlar. Sadəcə, təcrübələri azdır. Məsələn, rəqib beş nəfərlə oynayanda futzalçılarımız müqavimət göstərməkdə çətinlik çəkirlər. Baş məşqçi Vitali Borisov da bu məqamlardan narahat olduğunu mənə deyib".

Qeyd edək ki, Azərbaycan millisi Avropa çempionatının əsas mərhələsində yer aldığı V qrupu 2 xalla sonuncu pillədə bitirib.