Report.az
Azərbaycan Kubokunun yarımfinal mərhələsinin cavab oyununda üz-üzə gələcək "Sabah" və "Neftçi" kollektivlərinin duelini erkən final adlandırmaq olar.
Bunu "Report"a açıqlamasında "Qarabağ" və "Araz-Naxçıvan" klublarının sabiq futbolçusu Emin İmaməliyev deyib.
Yığmanın sabiq üzvü Azərbaycan Kubokunun yarımfinal mərhələsinin cavab oyunlarında üz-üzə gələcək komandaların şanslarını dəyərləndirib:
"İlk oyunda qazandığı qələbəyə görə üstünlük "Araz-Naxçıvan"ın tərəfindədir. Bununla belə, "Qarabağ"ın gücü hər kəsə bəllidir. Premyer Liqada da, demək olar ki, çempionluğu təmin ediblər. Bu baxımdan qızıl dubla imza atmaq istəyəcəklər. Futbol azarkeşləri maraqlı görüşə şahidlik edəcəklər. Çünki "Araz-Naxçıvan" da "döyüşkən" komandadır. Bu qarşılaşmada, cuzi olsa da, "Qarabağ"ı üstün sayıram. Böyük ehtimalla görüşün taleyini dəyişməyə can atacaqlar. Əminəm ki, maraqlı və gərgin oyun olacaq".
Mütəxəssis "Sabah" və "Neftçi" kollektivlərinin duelində tərəflərin şanslarının eyni olduğunu bildirib:
"Hər iki komandanın həlledici mərhələyə çıxmaq şansı 50/50-dir. Baxmayaraq ki, "Sabah" ilk matçda qələbə qazanıb. Lakin nəzərə almaq lazımdır ki, hesab arasındakı fərq elə də böyük deyil. Bu səbəbdən "Neftçi"nin mərhələ adlamaq imkanı qalır. Hər iki komandanın avrokuboklara yolu ölkə kubokundan keçir. Bu qarşılaşmaya erkən final kimi də baxa bilərik".
Qeyd edək ki, aprelin 23-də keçiriləcək Azərbaycan Kubokunun yarımfinal mərhələsinin cavab görüşlərində "Qarabağ" "Araz-Naxçıvan"ı, "Sabah" isə "Neftçi"ni qəbul edəcək. İlk qarşılaşmalarda Naxçıvan təmsilçisi 1:0, "bayquşlar" isə 2:1 hesablı qələbəyə sevinib.
