Idman.biz
Bu gün Azərbaycan milli komandası 2026-cı il Dünya Çempionatının seçmə mərhələsinin V turunun D qrupu çərçivəsində növbəti oyununa çıxacaq.
İdman.Biz olaraq qarşılaşmadan öncə hər iki milli komanda haqqında maraqlı tarixi faktları oxucularımıza təqdim edirik.
Azərbaycan və İslandiya milliləri tarixlərində üçüncü dəfə üz-üzə gələcəklər. Komandaların ilk dueli 2008- ci ilə təsadüf edib. Reykyavikdə təşkil olunan yoldaşlıq görüşündə 1:1 hesablı heç-heçə qeydə alınıb. Hesabı 48-ci dəqiqədə millimizin heyətində Fabio Luis Ramim açıb. Meydan sahibləri 10 dəqiqə sonra bərabərlik topunu vurublar.
Düz 17 il sonra - yəni bu il komandalar eyni arenada ikinci dəfə qarşılaşıblar. Budəfəki matç rəsmi xarakter daşıyıb. Sentyabrda DÇ-2026-nın seçmə mərhələsi çərçivəsindəki oyunda meydan sahibləri 5 cavabsız qolla qələbə qazanıblar. Məhz həmin matçdan sonra Fernandu Santuşla yollar ayrılıb və millimizin baş məşqçi postu Ayxan Abbasova tapşırılıb.
MARAQLI NÜANS
Azərbaycan və İslandiya futbolu arasında çox az bağlılıq var. Doğrudur, klublarımız avrokuboklarda bir neçə dəfə Skandinaviya ölkəsinin təmsilçiləri ilə qarşılaşıb. Ancaq Premyer Liqamızda indiyə qədər cəmi bir island çıxış edib. Bu da İslandiya tarixinin ən uğurlu qapıçılarından olan Hannes Halldorssondur. DÇ2018-də Argentina yığmasına qarşı keçirilən matçda Lionel Messinin penalti zərbəsini dəf edən Halldorsson mundialdan sonra "Qarabağ"a keçib. Lakin qolkiper 2018/2019-cu illər mövsümü başa çatmamış Ağdam klubundan ayrılıb.
Maraqlıdır ki, İslandiya çempionatında oynamış azərbaycanlı futbolçu sayı daha çoxdur. 1998-ci ildə Zaur Tağızadə və Ruslan Musayev "Akranes" klubuna keçiblər. Lakin onlar da orada cəmi 6 ay qalıblar.
BAŞ MƏŞQÇİLƏR
İslandiya millisinin baş məşqçisi Arnar Berqmann Qunnlauqssonun futbolçu karyerası heç də pis keçməyib. Belə ki, sabiq hücumçu "Feyenoord" (Niderland), "Nürnberq" (Almaniya), "Soşo" (Fransa), "Bolton", "Lester", "Stok Siti" (İngiltərə) və "Dandi Yunayted" (Şotlandiya) kimi klubların formasını geyinib.
İslandiya millisinin heyətində 32 oyunda 3 qol vuran Qunnlauqsson məşqçiliyə 2006-cı ildə yetirməsi olduğu "Akranes"də başlayıb. 2017-ci ildə köməkçi məşqçi kimi keçdiyi "Vikinqur"a bir il sonra baş məşqçi təyin olunub. Həmin vaxtdan bu ilə qədər də Reykyavik klubuna rəhbərlik edib. Bu müddət ərzində komandaya 2 dəfə (2021, 2023) İslandiya çempionluğunu, 4 dəfə (2019, 2021, 2022, 2023) ölkə kubokunu, 2 dəfə (2022, 2024) isə Superkubokunu qazandırıb.
2021 və 2023-cü illərdə ölkədə ilin məşqçisi seçilən 52 yaşlı mütəxəssis bu ilin yanvarında İslandiya yığmasının "sükanı arxası"na keçib. Komanda onun rəhbərliyi altında cəmi 7 matça çıxıb ki, bunun 2-də qələbə qazanıb, 5 dəfə məğlub olub.
Azərbaycan millisinin yeni baş məşqçisi Ayxan Abbasov isə artıq 10 ildir məşqçiliklə məşğuldur. 16 illik futbolçu karyerası ərzində müxtəlif klublarda, eləcə də, U-17, U-19 və U-21 yığmalarımızda çıxış etmiş 44 yaşlı mütəxəssis 2015-ci ildə məşqçiliyə başlayıb. "Zirə"də köməkçi məşqçi kimi fəaliyyətə başlayan Abbasov 2016/2017 mövsümünün ikinci yarısında baş məşqçi kimi debüt edib. "Zirə" onun rəhbərliyi altında mövsümü 4-cü pillədə başa vurub. Növbəti mövsümdə də qəsəbə təmsilçisi eyni nəticəni təkrarlayıb.
2018/2019 mövsümünə də "Zirə"də başlayan Ayxan Abbasov cəmi 2 turdan sonra komandadan ayrılıb və mövsümün gedişində "Sumqayıt"ın sükanı arxasına keçib. Çalışdırıcı ilk mövsümündə "gənclik şəhəri" təmsilçisini Azərbaycan Kubokunun finalına daşıyıb. Onun rəhbərliyi altında 2019/2020 mövsümündə Premyer Liqada 4-cü yeri tutan "Sumqayıt" tarixində ilk dəfə avrokuboklarda iştirak hüququ qazanıb. Növbəti mövsüm isə "kimyaçılar" ölkə çempionatının bürünc mükafatçısı olmaqla yanaşı, kubokda da finala qədər irəliləməyi bacarıb.
"Sumqayıt"da 3 illik uğurlu fəaliyyətin ardından 2021-ci ilin sonunda komandadan ayrılan Ayxan Abbasov növbəti iki mövsümü "Turan Tovuz"da keçirib. Mütəxəssis ötən ildən Premyer Liqanın digər təmsilçisi "Şamaxı"nı çalışdırır. O, eyni zamanda bu ilin martından sentyabrına qədər U-21 millimizə rəhbərlik edib.
Dünya çempionatının seçmə mərhələsi çərçivəsində İslandiya yığmasına qarşı keçirilən ilk oyundan sonra Fernandu Santuşla yollarını ayıran milli komandamız dörd gün sonra Bakıda Ukrayna önünə məhz Ayxan Abbasovun rəhbərliyi altında çıxıb və güclü rəqibi ilə heç-heçə edib – 1:1.
REKORDÇULAR
İslandiya millisi ilk beynəlxalq oyununu 29 iyul 1930-cu ildə Farer adalarına qarşı keçirib. Torshavndakı matçda islandlar 1:0 hesablı qələbə qazanıblar. İslandiya millisinin ən böyükhesablı qələbəsi 9:0 olub. Skandinaviyalıların ən böyükhesablı məğlubiyyəti isə 2:14 olub. Komanda 1967-ci il avqustun 23-də Kopenhagendə Danimarkaya belə böyük fərqlə uduzub.
Azərbaycan millisinin ilk beynəlxalq oyunu 1992-ci il sentyabrın 17-də Gürcüstan seçməsinə qarşı olub. Gürcaanidə keçirilən görüşdə ev sahibləri 6:3 hesablı qələbə qazanıblar. Komandamızın ən böyükhesablı qələbəsi 4 top fərqi ilə olub. Millimiz 1999-cu ildə Lixtenşteynə 4:0, 2017-ci ildə isə San Marinoya 5:1 hesabı ilə qalib gəlib. Komandamız ən böyükhesablı məğlubiyyətini 1995-ci ildə səfərdə Fransadan alıb - 0:10.
ƏN ÇOX OYUN KEÇİRƏN 5 FUTBOLÇU
İslandiya millisi ən çox oyun keçirən Birkir Byarnasondur. O 2010-2022-ci illər arasında 113 oyun keçirib. Onu 107 oyunla Aron Qunnarsson (2008-...) izləyir. Sonrakı sıraları Runar Kristinsson (104 oyun - 1987-2004), Birkir Mar Sevarsson (103 oyun - 2007-2021) və Yohann Berq Qudmundsson (99 oyun - 2008-...) tutur.
Azərbaycan millisinin rekordçularına 111 oyunla Rəşad Sadıqov (2001-2017) başçılıq edir. İkinci sırada 81 oyunla Maksim Medvedevdir (2009-2022). 80 oyunla Aslan Kərimov (1994-2008) üçüncü sıradadır. Kamran Ağayev ( 79 oyun - 2008-2018) və Bədavi Hüseynov (78 oyun - 2012-...) növbəti sıralamalarda yer alıb.
ƏN ÇOX QOL VURAN 5 FUTBOLÇU
İslandiya millisinin ən çox qol vuran oyunçuları aşağıdakılardır:
1. Qulfi Siqurdsson 27 qol (2010–...)
2. Kolbeynn Siqtorsson 26 qol (2010–2021)
3. Eydur Qudyonsen 26 qol (1996–2016)
4. Alfred Finnboqason 18 qol (2010–2023)
5. Rikhardur Yonsson 17 qol (1947–1965)
Azərbaycan millisində fərqlənin oyunçuları isə aşağıdakılardır:
1. Emin Mahmudov 15 qol (2016-...)
2. Qurban Qurbanov 14 qol (1992-2005)
3. Ramil Şeydayev 10 qol (2016-...)
4. Vaqif Cavadov 9 qol (2006-2014)
5. Dmitri Nazarov 8 qol (2014-2022)
SON 5 OYUN
İslandiya
10.06.2025 Yoldaşlıq görüşü: Şimali İrlandiya - İslandiya 1:0
05.09.2025 DÇ-2026, seçmə mərhələ: İslandiya - Azərbaycan 5:0
09.09.2025 DÇ-2026, seçmə mərhələ: Fransa - İslandiya 2:1 Paris
10.10.2025 DÇ-2026, seçmə mərhələ: İslandiya - Ukrayna 3:5
13.10.2025 DÇ-2026, seçmə mərhələ: İslandiya - Fransa 2:2
Azərbaycan
10.06.2025 Yoldaşlıq görüşü: Azərbaycan - Macarıstan 1:2
05.09.2025 DÇ-2026, seçmə mərhələ: İslandiya - Azərbaycan 5:0
09.09.2025 DÇ-2026, seçmə mərhələ: Azərbaycan - Ukrayna 1:1
10.10.2025 DÇ-2026, seçmə mərhələ: Fransa - Azərbaycan 3:0
13.10.2025 DÇ-2026, seçmə mərhələ: Ukrayna - Azərbaycan 2:1
REYTİNQ
İslandiya millisi FIFA reytinqində hazırda 74-cü yerdədir. Ən yaxşı mövqeyi 2018-ci ilin fevral-mart aylarına təsadüf edir: 18-ci yer. Ən zəif mövqe isə 2012-ci ilin aprel-iyun ayalrında olub – 131-ci yer.
Azərbaycan millisi FIFA reytinqi hazırda 124-cü yerdə qərarlaşıb. Ən yaxşı mövqe 2014-cü ilin iyul ayında olub, 73-cü yer. Ən zəif sıralama isə 1994-cü ilin iyun ayına aiddir - 170-ci yer.
Qeyd edək ki, Azərbaycan - İslandiya oyunu 8-ci km qəsəbə stadionunda keçiriləcək.
