Report.az
"Qəbələ"nin qapıçısı Səlahət Ağayev "Report"a müsahibə verib. O, komandasının I Liqadakı uğurlu çıxışından və Azərbaycan Kubokunun 1/8 finalında qarşılaşdıqları "Qarabağ"la oyundan danışıb. Azərbaycan millisinin sabiq qolkiperi I Liqa klubuna keçidinin səbəblərindən də danışıb.
- Azərbaycan Kubokunun 1/8 finalında "Qarabağ"a məğlub oldunuz. Oyun barədə nə deyə bilərsiniz?
- Düzdür, məğlub olduq. Lakin "Qarabağ" kimi komanda ilə qarşılaşmaq faydalıdır. Həm gücünü artırırsan, həm də öz gücünü göstərə bilirsən. Düşünürəm ki, həmin matçda yaxşı komanda olduğumuzu göstərə bildik.
- Görüşü yüksək səviyyədə keçirməyinizə baxmayaraq, sonda məğlub oldunuz. "Qəbələ"nin Azərbaycan Kubokunun püşkatması zamanı bəxtinin gətirmədiyini düşünürsünüz?
- Mərhələ adlamaq baxımından püşkün "Qarabağ"ı bizə rəqib etməsi yaxşı olmadı. Lakin dediyim kimi, güclü komandalarla qarşılaşmaq xeyrimizədir.
- Azərbaycan I Liqasında 8 tur ərzində məğlub olmayan və qol buraxmayan yeganə komanda "Qəbələ"dir. Komandanın uğurlu çıxışının sirri nədir?
- Məqsədimiz hər kəsə bəllidir. Yüksək nəticələr qazanaraq yenidən Premyer Liqaya qayıtmaq istəyirik. Komanda olaraq çox çalışırıq, əlimizdən gələn hər şeyi edirik. Yəqn ki, uğurlu çıxışın sirri də çox çalışmaqdadır. İnşallah, sona qədər bu tempdə davam edəcəyik.
- 8 tur ərzində qapınızın toxunulmazlığını qorumağınızı nə ilə əlaqələndirirsiniz? Müdafiəçilərin bu işdə köməyi çoxdur?
- Tam səmimi deyə bilərəm ki, qol buraxmamaq mənim üçün bir o qədər önəmli deyil. Əsas odur ki, komandam hər görüşü 3 xalla başa vursun. "Qəbələ" 8 tur ərzində qapısının toxunulmazlığını qoruyubsa, bunda komanda yoldaşlarımın da əziyyəti var
- Hər zaman Premyer Liqada iddialı klublarda çıxış etmiş və Azərbaycan millisinin üzvü olmuş qapıçının I Liqa klubuna keçidinin səbəbi nə idi?
- Komandanın baş məşqçisi Kaxaber Sxadadaze və kapitan Asif Məmmədovun bu keçiddə rolu önəmli idi. Asif mənə dedi ki, Kaxaber Sxadadze səni "Qəbələ"də görmək istəyir. Onlar mənə güvəndilər. Mən də öz növbəmdə təklif gələn kimi düşünmədən qəbul etdim. Çünki Sxadadzenin olduğu yerdə hər zaman güclü komanda formalaşıb və nəticələr yüksək olub.
- Bunu karyeranızda geriyə addım hesab etmirsiniz?
- Qətiyyən! Əksinə, doğru qərar qəbul etdiyimi düşünürəm. Müvəqqəti çətinlikdən sonra hər şey daha da yaxşı olacaq.
- "Qəbələ" I Liqanın çempionu kimi Premyer Liqaya vəsiqə qazansa, klubda qalacaqsınız?
- İndidən bu məsələlər barədə danışmaq tezdi. Hər şeyi gələcək göstərəcək.
- Səlahət Ağayevi qarşıdakı illərdə iddialı klublarda görə biləcəyik?
- Son iki sualınızın cavabını vermək çox tezdir. Birinci hədəfimiz "Qəbələ"ni Premyer Liqaya qaytarmaqdır. Daha sonra hər şey öz axarına düşəcək. Hər nə olacaqsa, xeyrimə olacağını düşünürəm.
- Hazırda Azərbaycan futbolunda yüksək səviyyəli qapıçı yetişməməsinin səbəbi nədir?
- Mənə elə gəlir ki, ölkəmizdə yaxşı, istedadlı qapıçılar var. Ancaq biz onları Premyer Liqada izləyə bilmirik. Çünki komanda sayı azdır. Belə olan halda həmin qapıçılar üzə çıxa bilmirlər.
- Azərbaycan millisinin sabiq qapıçısı kimi yığmanın uğursuz çıxışlarının səbəbini nədə görürsünüz?
- Kənardan nəsə demək çətindir. Ümid edirəm ki, pis günlər arxada qalacaq və növbəti yarışlarda komandamızın uğurlarına sevinə biləcəyik.
- Baş məşqçi Fernandu Santuşun fəaliyyətini necə qiymətləndirirsiniz?
- Fernandu Santuşun necə baş məşqçi olduğu hamıya bəllidir. Portuqaliya millisi ilə Avropa çempionu olarkən özünü sübut edib. Məncə, onun vaxta ehtiyacı var. Bir müddət sonra yığmamıza faydalı olacağını düşünürəm.
- Bu gün təklif gəlsə, özünüzü yığmanın qapısını qorumağa hazır hiss edirsiniz?
- Əlbəttə, hər bir futbolçunun arzusu milli komandada çıxış etməkdir. Nə vaxt mənə ehtiyac olsa, yığma üçün "döyüşməyə" hazıram. Hər zaman istəmişəm ki, Azərbaycan üçün faydalı idmançı olum. Yığma üçün oynamağa həmişə hazıram.
