Report.az
AFFA rəhbərliyi faydalı işlər görmək istəyir.
Bunu "Report"a açıqlamasında Azərbaycan millisinin sabiq futbolçusu Samir Əliyev Misli Premyer Liqasının 2025/2026 mövsümündə legioner limitinin ləğv olunacağına münasibət bildirərkən deyib.
Veteran hücumçu inkişafın uzunmüddətli proses olduğunu söyləyib:
"Müxtəlif fikirlər səsləndirilir, bunun faydalı olacağını və olmayacağını deyənlər var. Tam səmimi deyirəm, həqiqətən nəsə demək çətindir. Heç kim təminat verə bilməz ki, limitin ləğvindən sonra güclü rəqabət yaranacaq, futbolçular inkişaf edəcək, Avropaya yollanacaqlar. Bu, uzunmüddətli prosesdir. Qərarın nə dərəcədə vacib olduğunu deyə bilmərəm. Yəqin ki, qərar verənlər bunun Azərbaycan futboluna faydalı olacağını düşünüblər. AFFA rəhbərliyində dəyişikliklər olub, faydalı işlər görmək istəyirlər".
O, klubların futbolçu yetişdirməyə maraq göstərmədiyini qabardıb:
"Burada əsas problem limitlə yox, klubların strategiyası və yerli futbolçuların yetişdirilməsi, istedadların üzə çıxarılması ilə bağlıdır. Limit "7+4" şəklində olanda mən həmişə müsahibələrimdə futbolçuların öz klublarında oynamamasından gileylənirdim. Çünki futbolçuların oyun praktikası yox idi, matçlar zamanı bütün komponentlərdə rəqiblərdən geri qalırdılar. Bu, klubların gənc futbolçuları yetişdirməyə marağının olmamasından irəli gəlir. Klub maraq göstərmirsə, limitin olub-olmamasının faydası yoxdur".
S.Əliyev yerli futbolçuların qiymətinin süni şəkildə artması ilə bağlı fikirlərlə razılaşmır:
"Limit olanda bəziləri yerli futbolçuların qiymətinin süni şəkildə qalxdığını deyirdilər. Bu fikirlərlə razılaşmıram. Məgər ölkəyə gələn bütün legionerlər keyfiyyətlidir? Halbuki bəzi keyfiyyətsiz legionerlərə daha çox pul ödənilməsindən danışan yoxdur. Yerlilər də maaş almalıdır, pulsuz oynamamalıdır. Onsuz da legionerlərdən daha az qazanırlar. Amma azərbaycanlı futbolçularla eyni səviyyədə olanların daha çox maaş aldığını demirlər. Yenə də hər şeyi gələcək göstərəcək".
Qeyd edək ki, hazırda Premyer Liqada limit "7 legioner + 4 yerli futbolçu" şəklindədir. Fevralın 3-də keçirilən AFFA İcraiyyə Komitəsinin iclasında 2025/2026 mövsümündən etibarən legioner limitinin ləğvi ilə bağlı qərar çıxarılıb. Həmçinin əcnəbi futbolçuların sifarişi üçün böyük məbləğdə rüsum tətbiq olunub.
