Azərbaycan millisinin sabiq baş məşqçisi: “U-21-in ötən tsikldəki rəqibləri daha güclü idi”

U-21-in ötən tsikldəki rəqibləri daha güclü idi.

Bunu "Report"a açıqlamasında Azərbaycanın 21 yaşadək futbolçulardan ibarət mllisinin sabiq baş məşqçisi Samir Əliyev Avropa çempionatının seçmə mərhələsindəki rəqiblərlə bağlı fkirlərini bölüşərkən deyib.

Mütəxəssis rəqiblərdən bəzilərinin elə də yüksək səviyyədə olmadığını söyləyib:

"Püşkatmada zəif rəqiblər olmur. Bəzi komandalar futbol baxımından bizdən öndədirlər. Müqayisə etsək, məncə, U-21-in ötən tsikldəki rəqibləri daha güclü idi. Məsələn, indi qrupumuza düşən Bolqarıstanla Bakıda yolaşlıq matçı keçirmişdik. Yüksək səviyyədə deyillər. Həmçinin Cəbəllütariq də güclü deyil. Ötən tsikldə qrupumuzda olan Lüksemburq Cəbəllütariqdən daha güclü rəqib idi. İngiltərə, Ukrayna, Serbiya da daha səviyyəli komandalar idi. Əlbəttə, Portuqaliya və Çexiya da güclüdür. Səhv etmirəmsə, Çexiya Avropa çempionatının final mərhələsinə vəsiqə qazanıb. Daim bu mərhələlərdə oynayan komandalardır".

S.Əliyev Azərbaycanın U-21 millisinin durumundan çox şey asılı olduğunu vurğulayıb:

"Aydın məsələdir ki, Cəbəllütariqi bizlə müqayisə etmək olmaz. Amma bu rəqibə də hörmətlə yanaşmalıyıq və indidən 6 xalın cibimizdə olduğunu düşünməməliyik. Düzdür, indiki durumda bu qrupda ciddi nəticə qazanmaq çətindir. Bununla belə, komandaya ötən tsikldə beynəlxalq təcrübə qazandırmışıq. Fikrimcə, bunun futbolçulara köməyi olacaq".

Qeyd edək ki, U-21 Avropa çempionatının seçmə mərhələsinin B qrupunda Portuqaliya, Çexiya, Bolqarıstan, Şotlandiya və Cəbəllütariq komandaları ilə mübarizə aparacaq. Yarışın final mərhələsi isə 2027-ci ildə Serbiya və Albaniyada təşkil olunacaq.