Report.az
Son oyunlar göstərdi ki, "Neftçi" əvvəlki əzəmətini qaytarır.
Bunu "Report"a açıqlamasında AFFA Məşqçilər Komitəsinin sədri, Azərbaycan millisinin və "Neftçi"nin sabiq baş məşqçisi Vaqif Sadıqov Misli Premyer Liqasının XXIII turunda baş tutan "Neftçi" - "Qarabağ" matçını dəyərləndirərkən deyib.
Mütəxəssis "Neftçi"nin oyuna daha fəal başladığını vurğulayıb:
"Əsl derbinin şahidi olduq. Hər iki komanda bizə futbol bayramı bəxş etdi. Onu da xüsusi qeyd etmək lazımdır ki, azarkeşsiz bayram olmur. Bunun da şahidi olduq. Stadion dolmuşdu. Futbola rəng qatan, bayramı gözəl edən azarkeşlərdir. "Neftçi" oyuna fəal və çox yaxşı başlamışdı. Fikrimcə, "Qarabağ"ın futbolçusu qırmızı vərəqə ilə cəzalandırıldıqdan sonra "Neftçi" daha çox dominant futbol oynamağa çalışdı. Başqa çıxış yolu da qalmamışdı. Sona qədər bərabər səviyyəli oyunun şahidi olduq və nəticəyə təsir edən keyfiyyət ortaya çıxdı. "Qarabağ" keyfiyyətcə üstün olduğu üçün qələbə qazandı".
O, "Neftçi"nin əvvəlki əzəmətini qaytardığını bildirib:
"Gərgin və maraqlı oyun olacağını demişdim. Elə gözlənilən şəkildə də keçdi. Son oyunlar göstərdi ki, "Neftçi" əvvəlki əzəmətini qaytarır. Komanda ruhu, oyun intizamı var. Futbolçuların hər birini tanıyırıq. Son oyunlarda oturuşmuş heyət formalaşıb. Bu da önəmli amildir. Komanda doğma azarkeşlər önündə yaxşı futbol göstərməklə müsbət nəticə əldə etmək istəyirdi. "Neftçi"nin həmişə yüksək pillələr uğrunda mübarizə aparmasına öyrəşmişik. Komandanın çempionatın lideri "Qarabağ"la oyunda nəyə qadir olduğunu görmək çox maraqlı idi. Bundan əlavə, kubokda yoluna davam edən "Neftçi" belə rəqibə qarşı yaxşı oyun sərgiləməklə həm də psixoloji üstünlük əldə edir. Bu da istədikləri nəticəni qazanmaq üçün şansdır".
Qeyd edək ki, "Neftçi Arena"da keçirilən qarşılaşma Ağdam təmsilçisinin qələbəsi ilə yekunlaşıb - 1:0.
