Azərbaycan millisinin futzalçısı: "İlk qələbəmizi qazanmaq üçün əlimizdən gələni edəcəyik"

İlk qələbəmizi qazanmaq üçün əlimizdən gələni edəcəyik.

"Report" xəbər verir ki, bunu Azərbaycan futzal millisinin üzvü Kənan Manafov federasiyanın rəsmi saytına açıqlamasında deyib.

O, AVRO-2026-nın əsas mərhələsində səfərdə Yunanıstana qarşı keçirəcəkləri matçla bağlı fikirlərini bölüşüb:

"Normal hazırlıq keçmişik. Komandada vəziyyət yaxşıdır. Zədəli və bəzi problemlərə görə kollektivə qoşula bilməyən futzalçılarımız oldu. Onların yoxluğuna baxmayaraq, çalışacağıq ki, səfərdən yaxşı nəticə ilə dönək. Rəqibi yaxşı tanıyırıq. Son oyunumuzu da onlara qarşı keçirmişik. Bakıdakı matçda hesabı açan tərəf olsaq da, sonradan məğlub duruma düşdük. Halbuki bir neçə epizodda fərqi artıra bilərdik. Əvəzində son dəqiqədə bərabərlik qolunu vurduq".

Futzalçı Yunanıstan yığmasının onlardan fərqli olaraq martda artıq bir oyun keçirdiyini vurğulayıb:

"Onlar Xorvatiya millisi ilə qarşılaşıblar. Qrupun favoritinə minimal hesabla yeniliblər. Ümumilikdə biz onları, onlar da bizi yaxşı tanıyır. Baş məşqçimiz sabahkı oyunda müdafiədə və hücumda necə oynamalı olduğumuzu deyəcək. Əslində, məşq prosesində bunun üzərində işləmişik. Son təlimatları oyunöncəsi məşqdə alacağıq".

K.Manafov komandanın dünən səhər saatlarında Afinaya çatdığını xatırladıb:

"İlk məşqimizi oyunun keçiriləcəyi arenada deyil, başqa məkanda reallaşdırdıq. Bu məşq daha çox uzaq səfərdən sonra bərpa xarakteri daşıyırdı. Yenə deyirəm, məqsəd aydındır. Cari seçmə mərhələdə ilk qələbəmizi qazanmaq üçün əlimizdən gələni edəcəyik. Yunanıstan yığması da yaxşı rəqibdir. Xüsusilə də müdafiədə keyfiyyətli oynayırlar".

Qeyd edək ki, Yunanıstan - Azərbaycan matçı martın 11-də, Bakı vaxtı ilə saat 21:00-da start götürəcək.