Idman.biz
2022-ci ildə Təbrizin "Traktor"da çıxış etmiş Azərbaycan millisinin və "Neftçi"nin müdafiəçisi Höccət Haqverdinin Teleqraf-a müsahibəsi
- Sabiq komandanız "Traktor" tarixində ilk dəfə İran çempionu oldu. Bu xəbəri eşidəndə hansı hissləri keçirdiniz?
- "Traktor"da oynadığım üçün çox xoşbəxt idim. Çempionluğun bu komandanın azarkeşləri üçün nə qədər əhəmiyyətli olduğunu hiss edə bilirəm. Onlar 55 illik yarixlərində ilk dəfə qızıl medalları təmin etdilər və bu da qazandıqları uğuru daha dəyərli etdi.
- Keçmiş komanda yoldaşlarınızdan kimisə təbrik etməyə fürsətiniz oldumu? Heç düşündünüzmü: "Kaş mən də orada olaydım və bu anı özüm də yaşayaydım?"
- Xeyr, hələ bu komandadakı dostlarımı təbrik etmək fürsətim olmayıb, amma mütləq bunu edəcəyəm. Qalib "Traktor" komandasında olmaq istərdim. Bu, böyük şərəfdir.
- Gələcəkdə "Traktor"un oyunlarından birinə getmək və ya yaxın zamanda Təbrizə səyahət etmək planınız varmı?
- Vaxtım olsa, Təbrizə səyahət etməyi çox istərdim.
- Təcrübənizə əsasən, İran liqasını Azərbaycan Premyer Liqası ilə necə müqayisə edərdiniz: Hakimlik və rəqabət baxımından əsas fərqlər nələrdir?
- Ümumilikdə düşünürəm ki, İran Pro-liqasında rəqabət daha sərtdir və çempion olmaq çox çətindir. Bütün oyunlar ağır keçir, bütün komandaların çoxlu azarkeşi var. Amma Azərbaycanda bir-iki komanda ilə digərləri arasında fərq daha çoxdur. Buna görə də çempion olmaq daha asandır. Hakimlik isə demək olar ki, eynidir.
- Hazırda "Turan Tovuz"un baş məşqçisi olan türkmənistanlı Kurban Berdıyevlə birgə çalışmısınız. O dönəmləri necə xatırlayırsızınız?
- Bəli, Kurban Berdıyevi oradan tanıyıram. Berdıyev əla baş məşqçi və mükəmməl insandır. Mən onunla işləməkdən zövq alırdım. Ümumiyyətlə, kollektivimiz onun "Traktor"da olmasından məmnun idi. Yaxşı insan və peşəkar mütəxəssisdir. Azərbaycanda da çox yaxşı işlər görür. Onun təcrübəsi və gördüyü işlər, sadəcə alqışalayiqdir.
- Oradan ayrıldığınız zaman demişdiniz: "Ümid edirəm ki, gələcəkdə daha yaxşı şəraitdə və azarkeşlərin dəstəyinə təşəkkür əlaməti olaraq, "Traktor" formasını yenidən geyinərəm". Bu sözlərlə nə demək istəmişdiniz və həmin vaxt ayrılmağınıza nə səbəb olmuşdu?
- Bəli, "Traktor"da yenidən oynamaq istərdim. Orada yaxşı günlərim olub. Ayrılmağımın səbəbi icarə əsasında oynamağım və yarım mövsümdən sonra "Neftçi"yə qayıtmaq məcburiyyətində qalmağım idi.
- "Traktor" azarkeşləri çılğınlığı, sadiqliyi və güclü dəstəkləri ilə tanınır. Bu atmosfer bir futbolçu kimi sizə necə təsir edirdi?
- Azarkeşlər möhtəşəmdir. Əksər oyunlarda stadionda 40-50 min azarkeş olur. Hətta səfər oyunlarına belə, minlərlə azarkeş gəlir və bu da oyunçular üçün böyük motivasiyadır. Bu, eyni zamanda rəqib komandaya da mənfi təsir göstərir.
- Orada olduğunuz müddətdə farsların sizə münasibətin ayrı-seçkiliklə qarşılaşmısınızmı: Azərbaycan köklü klubda olmağın üstünlükləri və çətinlikləri nələr idi?
- İranda azərbaycanlılarla farslar arasında heç bir problemin olmadığını deyə bilərəm. Azərbaycanlılar İranın bir çox şəhərində farslarla yanaşı yaşayırlar. Mən Təbrizdə və İranın başqa şəhərlərində yaşadığımdan, bunu tam şəkildə hiss etmişəm. "Traktor" azarkeşləri ilə "Persepolis", "İstiqlal", "Sepahan" və digər məşhur komandaların azarkeşləri arasında ciddi rəqabət olsa da, bu, tamamilə futbolla bağlıdır və başqa heç bir məsələ ilə əlaqəsi yoxdur.
- "Qarabağ" baş məşqçisi Qurban Qurbanov "Traktor"la yoldaşlıq oyunu keçirməyə hazır olduqlarını bildirib. Belə bir oyunun baş tutması nə dərəcədə realdır?
- Düşünürəm ki, "Neftçi" və ya "Qarabağ"ın "Traktor"la yoldaşlıq oyunu keçirməsi çox gözəl fikir olardı. Təəssüf ki, bu, hələ baş verməyib, amma çox maraqlı ola bilər.
- Bir neçə il əvvəl "Neftçi" də "Traktor"la yoldaşlıq oyunu planlaşdırmışdı, amma bu, baş tutmadı. Belə bir oyunda onlara qarşı çıxmaq istərdinizmi?
- Əlbəttə, "Traktor"a qarşı başqa komandada deyil, "Neftçi"nin heyətində çıxış etməyi üstün tutaram.
- Yenidən şans yaransa, Təbrizə dönüb, yenidən "Traktor"un formasını geyinməyi düşünürsünüz?
- Əlbəttə, yenidən təklif alsam, "Traktor"a qayıtmaq istərdim.
- Milli komandanın üzvü kimi Azərbaycanla hansı bağlılığınız var?
- Mən İranda boya-başa çatmışam. Amma babam azərbaycanlıdır. Onlar əsl bakılıdırlar (gülür - red).
İdman.biz
