Sport24.az
Cari mövsüm Azərbaycan Kubokunda qol vuran ən gənc və yaşlı futbolçular müəyyənləşib. Sport24.az bu barədə araşdırma aparıb.
Ən yaşlı oyunçuların siyahısına "Şəfa"dan Tural Nərimanov başçılıq edir. O, "Difai"yə əlavə vaxtda uduzduqları (2:3) qarşılaşmada fərqlənib. Müdafiəçi 35 yaş 3 günündə bunu bacarıb.
İkinci sırada "Hypers Guba"dan Cavid İmamverdiyev (34 yaş, 9 ay, 5 gün) yer alıb. O, "Göygöl"ə qalib gəldikləri (3:2) görüşdə buna nail olub. "Üçlüy"ü "Qusar"dan Firuddin Ağalarov qapayır. "Şimal"a 1:4 hesabı ilə uduzduqları matçda fərqlənən cinah oyunçusu 33 yaş 10 ay 28 günündə adını tabloya yazdırıb.
Gənclərdən isə fərqlənənlər Premyer Liqa təmsilçilərinin üzvləridir. "Neftçi"dən Murad Məmmədov 18 yaş, 7 ay 8 günündə "Difai" ilə (6:0) görüşdə, "Səbail"dən Fərid Şahhüseyni 18 yaş, 7 ay, 24 günündə "Dinamo" (6:0) ilə qarşılaşmada, "Şamaxı"dan isə Fəxri Məmmədli 18 yaş, 10 ay, 27 günündə "Şəmkir"lə (6:1) dueldə qol vurub.
Qeyd edək ki, Azərbaycan Kubokunun finalında "Qarabağ" və "Sabah" komandaları üz-üzə gələcəklər. Həlledici matç mayın 31-də olacaq.
