Idman.biz
Azərbaycan milli komandası 2026-cı il dünya çempionatının seçmə mərhələsindəki çıxışını başa vurub. Bakıda Fransaya qarşı keçirilən son oyunun nəticəsi ilə bağlı az adamın şübhəsi vardı, lakin meydan sahibləri hesabı ilk açaraq xoş sürpriz etdilər. Qonaqların yüksək ustalığı sonda öz sözünü desə və fransızlar qələbə qazansa da (3:1), qarşılaşma ölkə futbolunun gələcəyi üçün ümidverici məqamların olduğunu göstərdi.
İdman.Biz xəbər verir ki, son turda rəqiblərin turnir baxımından hər hansı məqsədi olmadığı üçün bu, oyunun ritminə də təsir etdi.
Hər halda futbolçularımız dünya çempionatının ikiqat qalibləri ilə matça bir neçə gün əvvəl islandlarla oyundakına nisbətən daha rahat psixoloji vəziyyətdə çıxdılar. Elə bəlkə də bu yanaşma komandamıza hesabı tez açmağa və favoriti bir qədər çaşdırmağa imkan verdi. Qola aparan epizodun düşünülmüş kombinasiyanın nəticəsi olması da təsadüfi deyildi. Ceyhun Nuriyev Rəhman Daşdəmirovu irəli çıxardı, o isə cərimə meydançasına ötürmə etdi və Renat Dadaşov dəqiq zərbə ilə epizodu tamamladı. Estetik baxımdan həm kombinasiyanın quruluşu, həm də qolla yekunlaşması matçın əsl bəzəyi oldu və intriqa yaratdı.
Birinci hissədə daha üç qol vuruldu, lakin onların hamısı bizim qapımızdan keçdi. Fransa millisinin oyunçuları əvvəlcə Jan-Filipp Matetanın səyi ilə hesabı bərabərləşdirdi, ardından Maqnes Akliu atdığı qolla öndəliyi ələ aldı. Fasiləyə az qalmış Şahruddin Məmmədəliyevin avtoqolu ilə daha bir epizod yaşandı. Bu qeyri-adi qol matçın sonuncusu oldu, çünki ikinci hissə formal xarakter daşıdı. Fransızlar oyuna tam nəzarətdə davam etsələr də, artıq yüksək temp nümayiş etdirmirdilər.
Nəticə proqnozlaşdırılsa da, Azərbaycan millisinin fəxr edəcəyi məqamlar var. Fernando Santuşdan sonra komandanın Ayxan Abbasovun rəhbərliyi altında daha məzmunlu oyun sərgilədiyi görünür. Komandada iradə və sona qədər mübarizə istəyi formalaşmağa başlayıb ki, bunu Fransa ilə oyunda da görmək mümkün oldu.
Oyundan sonra baş məşqçi qeyd etdi ki, yığmamız ilk hissədə Fransa ilə əvvəlki oyunlarda İslandiya və Ukraynanın göstərdiyindən daha çox hücum edib:
"Biz hər görüşdə hücuma keçmək, irəli oynamaq istəyirik. Uşaqlar çalışırlar. Bilirdik ki, qrup çətindir. Püşkdən sonra Fransanın bizim qrupda olması böyük rezonans yaratmışdı. Çox vaxt böyük hesabla məğlub ola biləcəyimiz deyilirdi. Amma oynadığımız matçlar gələcək üçün ümid yaratdı. Göstərdi ki, vəziyyət necə olur-olsun, mübarizə aparmaq mümkündür. Futbolçuların xüsusilə taktiki baxımdan inkişaf etdiyini gördük. Öz güclərinə inam yarandı", - deyə A.Abbasov vurğuladı.
Məşqçi həmçinin komandanın növbəti turniri - Millətlər Liqasının D divizionu ilə bağlı planlarına toxundu:
"İlk növbədə biz bir pillə irəli getməli, C divizionuna yüksəlməliyik. İstəyirik ki, futbolçular daha yaxşı formada olsunlar. Amma nəyəsə nail olmaq istəyiriksə, zamana ehtiyac var. Yaxın vaxtlarda bütün suallara aydınlıq gələcək", - deyə Abbasov bildirib və gələcəkdə komandaya rəhbərlik edib-etməyəcəyinin AFFA tərəfindən müəyyənləşdiriləcəyinə işarə vurub.
Beləliklə, dünya çempionatının seçmə mərhələsində komanda bir xal topladı, üç qol vurdu və 16 qol buraxdı. Statistik göstəricilər belədir. Lakin əslində kollektivin inkişaf perspektivləri mövcuddur və əsas məsələ - bu təsnifat mərhələsində nümayiş etdirilən iradəni itirməməkdir.
Zəki Feyzullayev
