Idman.biz
Bakıdakı Azərbaycan - Fransa qarşılaşmasına təyinat alan hakimlər briqadası əvvəllər Ermənistan Kubokunun final oyununu idarə edib.
İdman.Biz-in məlumatına görə, qarşıdakı görüşü latviyalı hakim Andris Treymanisin başçılıq etdiyi briqada idarə edəcək. Ona yan xətt hakimləri Haralds Qudermanis və Aleksey Spasennikovs kömək edəcəklər.
Maraqlıdır ki, eyni briqada 13 may 2023-cü ildə İrəvanda keçirilən Ermənistan Kubokunun finalı - "Şirak" və "Urartu" arasındakı oyun da daxil olmaqla həmin matçda da iş başında olub.
Latviyalı hakimlər Ermənistan yığmasının oyunlarını da idarə ediblər. Treymanis daha əvvəl Ermənistan - Rumıniya (3:2, 31 mart 2021, DÇ-2022-nin seçmə mərhələsi), Ermənistan - Monteneqro (1:0, 24 mart 2022, yoldaşlıq oyunu), həmçinin Ermənistan U21 - Andorra U21 (4:1, U21 Avropa çempionatının seçmə mərhələsi) matçlarında işləyib.
Treymanis Azərbaycan futbolu ilə də yaxşı tanışdır. O, Almaniya - Azərbaycan (5:1, 8 oktyabr 2017, DÇ-2018-in seçmə mərhələsi), Azərbaycan - Belarus (0:1, 23 mart 2018, yoldaşlıq oyunu), eləcə də Çempionlar Liqasının təsnifat mərhələsində keçirilən BATE - "Qarabağ" (1:1, 14 avqust 2018) görüşlərində ədalət dağıdıb.
Hakim həmçinin gənclərdən ibarət komandaların matçlarında da çalışıb: Azərbaycan U21 - İsrail U21 (3:0, U21 Avropa çempionatının seçmə mərhələsi), Azərbaycan U17 - Ukrayna U17 (0:0) və Xorvatiya U17 - Azərbaycan U17 (2:1, U17 Avropa çempionatının seçmə mərhələsi) oyunları da onun idarəçiliyi ilə keçirilib.
Onun Fransa ilə bağlı təcrübəsi də bir o qədər genişdir. Treymanis daha əvvəl Lüksemburq - Fransa (1:3, 25 mart 2017, DÇ-2018-in seçmə mərhələsi) matçını, eləcə də müxtəlif gənclər yığmalarının iştirak etdiyi oyunları, o cümlədən Ukrayna U19 – Fransa U19 (1:3, U19 Avropa çempionatının final mərhələsi, 2015) görüşünü idarə edib. Bundan başqa, latviyalı hakimlər avrokuboklarda Fransa klublarının iştirakı ilə keçirilən matçlarda da ədalət təmsilçisi olublar.
Teymur Tuşiyev
