İdman.biz
Bu həftə Avropa Liqasında növbəti oyunlar keçiriləcək.
İdman.biz xəbər verir ki, Liqa mərhələsində mübarizə aparan "Qarabağ" da V turun matçına çıxacaq.
Azərbaycan çempionu evdə Fransa təmsilçisi "Lion"la görüşəcək. Bu, iki ölkə komandaları arasında 15-ci avrokubok görüşü olacaq.
"Qarabağ"la 10, Azərbaycan 14
İndiyədək Azərbaycan və Fransa klublarının yolları 7 dəfə kəsişib. Bu duellər çərçivəsindəkki 14 qarşılaşmada təmsilçilərimiz 2 qələbə qazanıblar. Fransa komandalarının hesabında 8 qalibiyyət var. Digər 4 görüşdə qalib müəyyənləşməyib. 10 qol vuran komandalarımız 24 qola üzülüblər.
Bu 14 oyundan 10-u "Qarabağ"ın iştirakı ilə baş tutub. Bir qələbə və 3 heç-heçəsi olan çempionumuz 6 dəfə məğlubiyyətlə üzləşib. Rəqib qapısına 7 qol vuran futbolçularımız 20 top buraxıblar.
"Peraşki" dövründən ilk xala qədər
Azərbaycan və Fransa klubları arasında ilk qarşılaşma 25 il əvvələ təsadüf edib. İntertoto kubokunda mərhələ adlamaqla buna nail olan ilk təmsilçimiz kimi düşən "Qarabağ" ikinci raundda "Monpelye" ilə üz-üzə gəlib. Futbolumuzun "peraşki" dövründə "Böyük beşlik" təmsilçisinə müqavimət göstərmək də mümkün olmayıb. Hər iki görüşdə rəqib böyük hesabla qalib gəlib.
Növbəti dueli 15 il gözləmək lazım gəlib. Tarixində ilk dəfə Avropa Liqasının qrupuna düşən Ağdam klubu "Sent Etyenn"lə eyni "dördlük"də mübarizə aparıb. Liqa1 təmsilçisi ilə başabaş mübarizə aparan çempionumuz hər iki görüşdən bir xalla ayrılıb.
Növbəti mövsüm yenidən Avropa Liqasının qrupuna yüksələn Qurbanovun komandası yenə Liqa1 təmsilçisi ilə rəqib olub. Avropada Fransanı təmsil edən "Monako"ya səfərdə uduzan "Qarabağ" Bakıda "Knyazlıq klubu"ndan xal qoparıb. Bununla da təmsilçimiz fransalılarla ardıcıl iki mövsümdə 3 heç-heçə edib.
Bir mövsümdə iki dəfə
2016/17 mövsümü Azərbaycan və Fransa klublarının yollarının iki dəfə kəsişməsi ilə əlamətdar olub. Hər iki duelə "Qəbələ" çıxıb. Roman Qriqorçukun komandası öncə III təsnifat mərhələsində, sonra qrupda fransalılarla görüşüb.
Avropa Liqasında "Lill"i mübarizədən kənarlaşdıran "Qəbələ" ilk qələbənin müəllifi olub. "Qırmızı-qaralar" qrupda "Sent Etyenn"lə görüşüb. Təmsilçimiz rəqibindən xal ala bilməyib.
Məhsuldar oyunlar və darmadağın
Növbəti iki duel yenidən "Qarabağ"ın hesabına yazılıb. Qurbanovun yetirmələri 2021/22 mövsümündə Konfrans Liqasından çıxdıqdan sonra "Marsel"ə rəqib olub. Adlı-sanlı rəqib pley-offun hər iki görüşündə qalib gəlib.
2022-ci ilin payızında isə Avropa Liqasının qrupundakı rəqib "Nant" olub. Bu dəfə də görüşlər məhsuldarlığı ilə seçilib. Son dörd görüşün heç birində 3-dən az qol vurulmayıb. Fransa təmsilçisi ilə Bakıdakı son görüş darmadağınla nəticələnib. "Qarabağ" rəqibini üç cavabsız qolla məğlub edib. Bu, klub tarixinə ilk, Azərbaycan futbolu tarixinə fransalılar üzərində 2-ci qələbə kimi düşüb.
Bu, həm də klublarımızın bu ölkədən olan rəqiblər üzərində yeganə böyükhesablı qələbəsidir. Maraqlıdır ki, fransalıların Bakıya ilk və son səfərləri eyni hesabla başa çatıb. 25 il əvvəl sevinən "Monpelye" olubsa, 2022-ci ildə "Qarabağ" sevinib.
1999/2000 mövsümü, İntertoto kuboku, 2-ci mərhələ
"Qarabağ" – "Monpelye" – 0:3, 0:6
2014/15 mövsümü, Avropa Liqası, qrup mərhələsi
"Qarabağ" – "Sent Etyenn" – 0:0, 1:1
2015/16 mövsümü, Avropa Liqası, qrup mərhələsi
"Monako" – "Qarabağ" – 1:0, 1:1
2016/17 mövsümü, Avropa Liqası, III təsnifat mərhələsi
"Lill" – "Qəbələ" – 1:1, 0:1
Qrup mərhələsi
"Sent Etyenn" – "Qəbələ" – 1:0, 2:1
2021/22 mövsümü, Konfrans Liqası, pley-off mərhələsi
"Marsel" – "Qarabağ" – 3:1, 3:0
2022/23 mövsümü, Avropa Liqası, qrup mərhələsi
"Qarabağ" – "Nant" – 3:0, 1:2
Qeyd edək ki, "Qarabağ" – "Lion" oyunu noyabrın 28-də Tofiq Bəhramov adına Respublika stadionunda keçiriləcək.
Vüqar Xeyrullayev
İdman.biz
