İdman.biz
Bu gün UEFA Millətlər Liqasında növbəti tura start verilir. Azərbaycan millisi noyabrın 16-da 5-ci turda C Liqasının 1-ci qrupunda üçüncülük rəqibi Estoniya ilə oyunda ilk xallarını toplamağa çalışacaq.
İdman.biz qrup autsayderlərinin bir-biri ilə müqayisədə üstün cəhətlərini aydınlaşdırıb.
Komandamızla ev oyununda 3 xalını qazanan estonlar vurulan toplarda üstünlük qazana bilməsələr də (3 qol), yığmamızdan (11) 3 qol az (8) buraxıblar. Rəqibimiz 3 qolunun 3-də millimizin qapısından keçirib və qrup favoritlərinin qapısına yol tapa bilməyib. Azərbaycan isə hələ ki, heç bir rəqibindən xal qoparmağın formulunu tapmasa da, hər üçünü mərkəzə dəvət edib.
Komandaların qol vurma tərzi fərqlidir. Hər iki yığmanın futbolçuları 3 qolundan 1-ni sol ayaqla vurubsa, digər 2-sini futbolçularımız başla, rəqiblərimiz sağ ayaqla vurub. Estonlar qollarından birini cərimə meydançası xaricindən vurublar.
Topa sahibolmada estonlar 38,8 faizlə Avropanın ən zəifləridirlər. Azərbaycan 49 faizlə orta mövqedədir.
Uğursuz nəticələrə, xalsızlığa baxmayaraq, Azərbaycan yığması hücum sayında Avropada 54 ölkə arasında 11-ci göstəriciyə malikdir – 161. Estoniya yığması 112 dəfə hücuma çıxıb.
Qapıya zərbələrin sayında Azərbaycan millisi iki dəfəyə yaxın üstünlüyə malikdir. Yığmamızda bu rəqəm 47, budəfəki qonaqlarımızda 25-dir. Estonlar bu cəhətdən Avropanın ən zəif altılığında yer alır. Komandamızda 18 zərbə qapı çərçivəsinə tuş gəlib, 17-si hədəfdən yayınıb, 12-si isə bloka alınıb. Rəqibin 8 zərbəsi qapını tapıb, 12-si yan ötüb, 5-i bloka alınıb.
Estonlar 4 oyunda 35 sərbəst zərbə vurublarsa, komandamız 65 sərbəst zərbə ilə qitə 7-cisidir.
Künc zərbələrini millimiz 21 dəfə yerinə yetirdiyi halda, rəqibimiz bu sahədə qitə sonuncusudur (4).
Ötürmələrin dəqiqliyinə görə (69,8%) qitədə yalnız Andorranı qabaqlayan baltikalılar 1170 zərbənin 831-də dəqiq olublar. 83,5 % dəqiqliyə malik millimiz 1732 ötürmədən 1464-nü ünvana çatdırıb.
Offsayda estoniyalılar 6, futbolçularımız 5 dəfə düşüblər.
Təkbətək mübarizəyə girişməkdə komandanızın üstünlüyü cüzidir – 46-nın 45-ə.
Estonları qitədə yeganə fərqləndirən cəhət qapıçı seyvidir. Karl Heyn 23 seyvlə həm özünü, həm komandasını Avropa birincisi edib. Bu dəfə millimizin heyətində yer almayan Mehdi Cənnətov 14 seyvlə özünü 9-cu, komandasını 13-cü edib.
Qayda pozuntularına estonlar 52, Azərbaycan futbolçuları 37 dəfə yol veriblər. Follara daha çox məruz qalan isə Azərbaycandır (59). Rəqibimizə qarşı 30 dəfə qayda pozuntusu olub.
Vüqar Məmmədov
İdman.biz
