Idman.biz
"İmişli"nin futbolçusu Azər Salahlının Futbolinfo.az-a müsahibəsi
– "Sabah"ı səfərdə 1:0 hesabı ilə məğlub edərək 3 xal qazandınız. Matç barədə nə deyə bilərsiniz?
– İlk hissədə həqiqətən də çətinlik çəkdik. Rəqib yaxşı komandadır, avrokuboklarda iştirak edirdilər. Səfərdə oynayırdıq, bu da əlavə çətinlik yaradırdı. Müdafiədə çox işləməli olduq. Şükürlər olsun ki, imkanlardan maksimum yararlandıq və qələbə qazandıq.
– Milli fasilə sizin üçün faydalı olacaqmı?
– Bu qələbə ilə kifayətlənmək olmaz. Çünki biz çox çalışmalıyıq, debütant komandayıq. Məşqlərimizi davam etdirməli və növbəti oyunlara hazırlaşmalıyıq. Bu fasilə bizə faydalı olacaq, daha yaxşı hazırlaşacağıq.
– Təcrübəli futbolçu olaraq karyeranız boyu bir neçə əcnəbi mütəxəssislə çalışmısınız. Portuqaliyalı baş məşqçi Jorj Kaşkilya ilə işləmək necədir, nə öyrənmisiniz?
– Əlbəttə, hər mütəxəssisin öz yanaşması olur. Çox fərqli məşqçidir, başqa oyun stili var. Gördüyünüz kimi kompakt oynayırıq, müdafiəyə meyilliyik. Heyətimizdə olan oyunçularla bu mümkündür. Kompakt müdafiədə oynayıb, əks-hücumlarda şansımızı gözləyirik. Komandada hər kəs bir-birinə fayda verir, hər kəs öz sahəsində dəstək olur. Baş məşqçi barədə yalnız xoş sözlər demək olar.
– "İmişli"yə futbol ictimaiyyəti tərəfindən qəribə təzyiq var – yəqin hiss edirsiniz. Bununla bağlı nə deyə bilərsiniz?
– Əlbəttə, xal qazandıqca rəqiblərin bizə olan yanaşması dəyişir, təzyiq artır. Öz oyunumuzla özümüzə hörmət qazanırıq. Çempionat başlamazdan əvvəl bəlkə də bəzi komandalar bizə yuxarıdan baxırdı. Amma hər oyunda göstəririk ki, hörməti öz gücümüzlə qazanırıq. Məncə, oyundan-oyuna daha da yaxşı olacaq.
– Azarkeşlərə nə demək istərdiniz?
– Azarkeşlərimizə də təşəkkür edirəm. Onlardan istəyim odur ki, hər zaman bizi dəstəkləsinlər. İnşallah, hər oyunda qələbə üçün mübarizə aparacağıq.
İdman.biz
