Idman.biz
"Bu qələbə ilk növbədə onun göstəricisidir ki, "Qarabağ"da hərtərəfli – həm rəhbərlik, həm də məşqçi heyəti olaraq, həqiqətən də, böyük və düzgün işlər görülür".
İdman.biz xəbər verir ki, bu sözləri "Qarabağ"ın sabiq müdafiəçisi Azər Məmmədovun futbolinfo.az saytına müsahibəsində deyib.
Həmin müsahibəni təqdim edirik:
– "Qarabağ"ın Çempionlar Liqasına qələbə ilə başlaması, səfərdə "Benfika"nı üstələməsi sizin üçün nə ifadə edir?
– Bu qələbə ilk növbədə onun göstəricisidir ki, "Qarabağ"da hərtərəfli – həm rəhbərlik, həm də məşqçi heyəti olaraq, həqiqətən də, böyük və düzgün işlər görülür, doğru istiqamətdədirlər. "Benfika" ilə görüş şəxsən mənə göstərdi ki, "Qarabağ" artıq dünya arenasında böyük klublarla başabaş oynayacaq səviyyəyə çatmış klubdur. Azərbaycanda belə bir klubun olması sevindirici haldır.
– Sabiq müdafiəçi kimi bu görüşdə "Qarabağ"ın müdafiə xəttinin performansından tam razı qaldınız? Sizinlə eyni mövqedə çıxış edən Elvin Cəfərquliyevin oyununu necə qiymətləndirirsiniz?
– Bütün futbolçuların sonadək mübarizə apardığını qeyd etməliyəm. Uşaqların hər biri əla mübarizə apardı. Komandanın iki qol buraxmasını sırf müdafiə xətti ilə əlaqələndirmirəm. Məncə, müdafiəçilər də normal çıxış etdilər. Ancaq "Qarabağ"ın xüsusi olaraq dayaq yarımüdafiəçilərini qeyd edərdim, onlar daha möhtəşəm idilər. Elvinə gəlincə, tək-tük yerli futbolçularımızdandır ki, stabil oyun göstərir. Öz mövqeyində Azərbaycanın ən güclülərindəndir. Həm müdafiədə, həm də hücumda komandası üçün faydalı futbolçudur. Elvin haqda ancaq xoş sözlər demək olar.
– "Qarabağ" 3-cü dəfə Ramil Şeydayevi heyətinə qatdı. Bu keçidə münasibətiniz necədir? Sizcə, Ramil "Qarabağ"a əlavə güc qata biləcək?
– Ramilin Azərbaycanda ən uğurlu karyerası "Qarabağ"da olub, ən yaxşı oyunlarını məhz Ağdam klubunda göstərib. Razıyam ki, "Sabah" və "Neftçi"də stabil çıxışla yadda qalmayıb. Biz də futbolçu olmuşuq, hər oyunçu öz komandasını tapmalıdır. Düşünürəm ki, Ramilin Azərbaycandakı komandası məhz "Qarabağ"dır. İnşallah, bu transfer Şeydayev üçün uğurlu olar və əvvəlki kimi, yenə "Qarabağ"a öz oyunu ilə fayda verər.
– Maraqlıdır ki, "Qarabağ"dan gedən futbolçular başqa klublarda əvvəlki oyunlarını göstərə bilmirlər. Bunun səbəbini nədə görürsünüz?
– Dediyiniz məqamla razıyam. Bu dəqiqə futbolda hər şey idarəçiliyin və sistemin üzərində qurulub. "Qarabağ" isə dediyim hər iki sahədə çox uğurludur. Etiraf edək ki, komandaya gələn yeni futbolçulardan heç tanınmayanları da olub. Əsasən Portuqaliyanın ikinci divizionundan gələnləri qeyd edərdim, onlar gəlib məhz "Qarabağ"da parlayırlar və daha yaxşı qiymətə başqa klublara keçirlər. "Qarabağ"ın özəlliyi odur ki, həm idarəçilik, həm də sistem baxımdan klubda işlər çox gözəl qurulub deyə, burada futbolçular daha rahat olurlar və daha keyfiyyətli oyun göstərirlər.
– Vaxtilə millinin də formasını geyinmisiniz. Fernandu Santuşun İslandiyaya ağır məğlubiyyətdən (0:5) sonra istefaya göndərilməsini və Ayxan Abbasovun rəhbərliyi altında millimizin Ukraynadan 1 xal almasını (1:1) necə dəyərləndirirsiniz? Sizcə, millinin baş məşqçisi postunda elə Ayxan Abbasovu saxlamaq ən doğru qərar olmaz?
– Mən Santuş gətiriləndə də deyirdim ki, yığmamıza əcnəbi məşqçinin təyin olunması hələ düzgün deyil, biz yerli mütəxəssislərə imkan yaratmalıyıq. Fikrimcə, Santuşun istefaya göndərilməsi gecikmiş addım idi, onu daha tez göndərmək lazım idi. O ki qaldı millimizin Ayxan Abbasovun rəhbərliyi altında Ukraynadan 1 xal götürməsinə, ona qədər yığmamızda milli ruh, əzmkarlıq çatışmırdı. Ancaq Ayxan 1 günün içində həmin ruhu, əzmkarlığı komandaya aşıladı və göründü ki, biz gözlədiyimiz şeylər əslində futbolçularımızda var. Baş məşqçi Ayxan, ya başqası olacaq, bilmirəm, amma mütləq həmin posta yerli mütəxəssis təyin edilməlidir. Sırf Ayxan variantına gəlincə, əgər uğur qazana bilirsə, niyə də olmasın?!
İdman.biz
