Idman.biz
UEFA Çempionlar Liqasının (ÇL) pley-off mərhələsinin ilk oyunları çərçivəsində səfərdə "Ferentsvaroş"la qarşılaşan "Qarabağ" evə 3:1 hesablı qələbə ilə qayıtdı.
İdman.biz xəbər verir ki, "Araz-Naxçıvan"ın və "Kəpəz"in sabiq baş məşqçisi Azər Bağırov Fanat.Az-a Macarıstandakı oyun haqda fikirlərini açıqlayıb.
Mütəxəssis "Qarabağ"ın oyuna çox yaxşı hazırlaşdığını bildirib: "Eyni zamanda Ağdam klubu rəqibin güclü tərəfləri barədə məlumatlı idi. Bu səbəbdən təmsilçimiz ilk hissədə birinci, ikinci və üçüncü zonada çox sığortalı oynayırdı. Bir texniki səhv meydan sahiblərinin qol vurmasına səbəb oldu. İkinci yarıda isə "Qarabağ" ikinci və üçüncü zonada pressinq tətbiq etməyə çalışdı. "Ferentsvaroş" daha çox uzun ötürmələrlə oynadığı üçün təmsilçimizin üçüncü zonada top almaq planı o qədər də yaxşı alınmırdı, buna baxmayaraq, komandamız ikinci topları götürüb inamlı əks-hücumlar qurmağı bacardı. Düzdür, qolların hamısı əks-həmlələr zamanı vurulmadı, amma fasilədən sonra üç qola imza atan qonaqlar evə inamlı qələbə ilə qayıtmağı bacardılar. Mənə elə gəlir ki, təmsilçimiz evdə də eyni qaydada oynamalıdır. "Qarabağ" birinci hissədə bir qol vursa, "Ferentsvaroş" "sınacaq".
İdman.biz
