Azər Bağırov: "Tez bir zamanda mehriban bir ailə yaratdıq" - MÜSAHİBƏ

Ötən gün "Kəpəz"in baş məşqçi postundan ayrılan Azər Bağırovun AZƏRTAC-a müsahibəsi

– "Kəpəz"lə yollarınızı ayırdınız. Bu proses necə baş tutdu?

– Açığı, bu barədə danışmamağa söz vermişdim. Amma bu, şəxsi məsələdir. Mənimlə yolların ayrılacağı artıq "Turan Tovuz"la oyundan iki gün əvvəl bəlli idi. Klub rəhbərliyi ilə görüşdə irəli sürdüyüm bəzi şərtlər isti qarşılanmadı. Mən də dedim ki, əgər bu şəkildə davam edəcəksə, yollarımızı ayırmaq daha yaxşı olar.

– Şərtlərdən bəhs etdiniz. Klub rəhbərliyi ilə hansı məsələlərdə ortaq məxrəcə gələ bilmədiniz?

– Bir məşqçi kimi mənim də istəklərim var idi. Sadəcə onu deyə bilərəm ki, şərtlərim qəbul olunmadı. Dünən keçirilən mətbuat konfransında da qeyd etmişdim ki, bəzi məsələlər var ki, onlar klubla aramızda qalmalıdır.

– "Kəpəz"də çalışdığınız müddətdə komandada nəyi dəyişə bildiniz?

– Hamı yaxşı bilir ki, "Kəpəz"in Premyer Liqada qalması çox çətin görünürdü. Klub rəhbərliyinin belə ümidi demək olar ki, yox idi. Bəlkə də, min adamdan biri möcüzəyə inanırdı. Azarkeşlər və futbol mütəxəssislərinin çoxu "Kəpəz"in aşağı liqaya düşəcəyini düşünürdü. Amma biz geridönüş etdik. Mənim üçün sağlam mühit və kollektiv ruh çox önəmlidir. Qısa müddətdə gözəl bir komanda və mehriban bir ailə yaratmağı bacardıq. Hər kəs meydanda bir nəfər kimi vuruşurdu.

Reallıq budur ki, komandada yüksək ustalığa malik futbolçular yox idi. Amma oyunçular daim əzmkarlıq göstərdilər, daha az səhv etməyə çalışaraq qələbəyə kökləndilər. Maliyyə baxımından bizdən qat-qat üstün komandalara qarşı oynayıb nəticə qazandıq. "Neftçi", "Sabah", "Qarabağ" kimi büdcəsi böyük klublara qarşı heç-heçə və qələbələrimiz oldu. Bu oyunlar həm azarkeşləri sevindirdi, həm də komanda haqqında müsbət rəy formalaşdırdı.

– Artıq "Kəpəz" klubuna yeni rəhbərlik gəlib və maliyyə vəziyyəti də əvvəlki illərə nisbətən daha yaxşı olacaq. Sizcə, növbəti mövsüm komanda necə çıxış edəcək?

– Bundan sonra kluba yalnız uğurlar arzulayıram. Bu komandaya və azarkeşlərinə böyük rəğbət bəsləyirəm. Gəncə doğrudan da Azərbaycanın futbol beşiklərindən biridir. Amma yeni mövsümdə hansı nəticələri əldə edəcəklərini proqnozlaşdırmaq çətindir.

– Gələcək karyeranız barədə nə düşünürsünüz?

– Açığı, hər kəs elə bilirdi ki, mən "Kəpəz"də qalacağam. Hazırda konkret bir təklif yoxdur. Ümid edirəm ki, yaxın vaxtlarda təkliflər olacaq və mən də onları dəyərləndirəcəyəm.

İdman.biz