Azər Bağırov: "Məncə, azarkeşlərimizin rəğbətini qazanmışıq"

Azərbaycan Premyer Liqasının XIII turunun "Sabah" – "Kəpəz" oyunundan (2:2) sonra qonaq komandanın baş məşqçisi Azər Bağırov jurnalistlərin suallarını cavablandırıb. Sport24.az xəbər verir ki, mütəxəssis əvvəlcə görüşlə bağlı fikirlərini bölüşdü…

– Emosiyalar qarışıq idi. Gərgin oyun oldu. Oyunu üç hissəyə bölərdim. Qola qədər, qoldan sonra və son dəqiqələr. Qələbə qazanmaq istəyirdik. Heç-heçəyə baxmaq belə istəmirik, komandada qələbə ruhu yaşatmaq istəyirəm. Qələbə istəsən, heç-heçə sənin olacaq. Meydanda döyüşməyəcəksənsə, rəqib səni üstələyəcək. Birinci məqsədimiz döyüşkən, kimdənsə çəkinməyən komanda yaratmaqdır.

– Hakimliklə bağlı fikirləriniz nədir?
– "Araz-Naxçıvan"da olan Rəşad 26-cı turda "Turan Tovuz"la oyunda idarəçilik etmişdi və sonra 10 tur cəza almışdı. Bu gün VAR-da da o idi və yaxşı şey gözləmirdim.

– Rəqibiniz "Səbail" də xal qazandı. Mübarizə gərgin keçir. Qarşıda fasilə var. Bu müddət komandaya necə təsir edəcək?
– Müsbət və mənfi cəhətləri ola bilər. İnanıram ki, fasilə xeyrimizə olacaq. Oyundan-oyuna döyüşkənlik, ritm artıb. Düşünürəm ki, xeyrimizə olacaq.

– Yeni gələndə Gəncədə veteran futbolçuların narazılığı var idi. Yəqin ki, indi bu proseslər sona çatıb…
– O, təbii hal idi. Cavan kadr görəndə şübhəli yanaşırlar. Şükürlər olsun, bu gün dəstəyimiz var. Gəncədə futbolu sevirlər. Hərənin sevgisi bir cür ola bilər. Yekunda nəticə önəmlidir. "Səbail"lə oyunda bir az zəif oynayıb ,qələbə qazandıq. Bu gün isə üstün oynadıq, heç-heçə etdik. Məncə, azarkeşlərimizin rəğbətini qazanmışıq.

– İki turdur, "Sabah" da son dəqiqədə qol buraxır, siz də son dəqiqədə qol vurursunuz…
– Uşaqlar sona qədər mübarizə aparır. Son 4 turda əlavə vaxtlarda ekstra qələbə istəyi olur. Qorxaq adamla yola çıxmaq olmaz.