Azər Bağırov: "Kimisə istefaya göndərə bilmərik"

Misli Premyer Liqasının XXV turunda keçirilən "Kəpəz" – "Neftçi" (1:0) matçından sonra meydan sahibi komandanın baş məşqçisi Azər Bağırov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə oyunla bağlı fikirlərini bölüşdü:

– Nə qədər epizodlar yaradırıq, saədəcə dəyərləndirə bilmirik. "Neftçi"yə qarşı oynayırdıq. Bundan öncə iki kubok matçında uduzmuşduq. Allaha həmd olsun ki, bu gün çox vacib 3 xal qazandıq.

– Kərim Lkoça 2 epizodu qaçırdı. Həmin vaxt bir narahatlıq yarandımı?

– O barədə fikirləşmirəm. Vursa, daha yaxşı olardı. Rəqibi bir neçə əks-hücumda tutduq, amma bura bilmədik.

– Vaqif Cavadov sonuncu mətbuat konfransında demişdi ki, "Kəpəz"lə oyunda hər şeyi görəcəksiz. Həmin sözlərlə tanışsız?

– Düzü o barədə fikirləşməmişik. Sırf oyuna köklənmişik. Doğrudan da "Neftçi" matçını çox gərgin gözləyirdik. "Sumqayıt"la oyuna baxarıq.

– "Sumqayıt" 11 oyundur ki, qol vura bilmir. Bunun sizin üçün mənfi yoxsa müsbət tərəfi daha çoxdur.

– Mənfi şeylər bizdə daha çoxdur nəinki bizdə. Hansı ki, evdə oynayırlar və ehtiyat oyunçular skamyası daha genişdir. Azarkeşlərimizə təşəkkür etmək istəyirəm. Kubok matçında qarlı havada bizi dəstəklədilər. Məğlub olsaq belə sağ olsunlar. Bu gündə dəstək oldular.

– "Səbail" və "Neftçi" "Kəpəz"ə uduzduqdan sonra baş məşqçiləri istefa vermişdi. Növbəti hədəf kimdir?

– Vaqifə də "Sumqayıt" futboluna da hörmətimiz var. Kimisə istefaya göndərə bilmərik. Bəlkə biz istefa verdik, bilmək olmaz.