Sport24.az
"Təbii ki, "Zirə" daha şanslıdı".
Bu sözləri Sport24.az-a açıqlamasında tanınmış futbol məşqçisi Azər Bağırov deyib. "Araz-Naxçıvan"ın sabiq baş məşqçisi UEFA Konfrans Liqasının III təsnifat mərhələsində "Sabah" və "Zirə" klublarının çıxışları haqqında bunları vurğulayıb:
"Ümumi götürəndə hər iki klubumuzun nəticəsi qənaətbəxşdi. Təbii ki, "Zirə" daha şanslıdı, onlar ilk oyunda rəqibə qıcıq da verdilər. Qəsəbə təmsilçisinin bugünki matçının ilk 25 dəqiqəsində, rəqibin sərgilədiyi futbol və "qartallar"ın onlara necə cavab vermələrindən çox şey asılı olacaq. "Sabah"a gəlincə, səfərdə minimal hesabla məğlub olsalar da, hələ heç nə bitməyib. Masazır təmsilçisi məğlubiyyətin heyfini almaq üçün meydana çıxıb xarakter sərgiləsə rəqibə üstün gələ bilər. "Sabah"la bağlı məni narahat edən məqam ilk oyunda müdafiəçinin qırmızı vərəqə alması oldu. Odur ki, cəzalı duruma düşən futbolçunun əvəzləyicisi özünü necə göstərməsi və bütünlükdə "bayquşlar"ın müdafiə xətdində etibarlı oynayıb-oynamayacaqlarından çox şey asılı olacaq. Amma inam olaraq hər iki klubumuzun növbəti mərhələyə keçəcəklərinə inanıram".
Qeyd edək ki, UEFA Konfrans Liqasının III təsnifat mərhələsinin cavab oyunları çərçivəsində "Zirə"- "Osiyek" matçı 20:30, "Sabah" - "Sent Patriks" oyunu isə 20:00da başlayacaq.
ABDULLA İSMAYILOĞLU
