Azər Bağırov: "Biz də diqqət, qayğı istəyirik"

"Doğru addım atdığımı düşünürəm".

İdman.biz xəbər verir ki, bunu "Kəpəz"in sabiq baş məşqçisi Azər Bağırov "CBC Sport" telekanalında yayımlanan "Start" verilişində deyib.

Bir neçə gün öncə Gəncə klubundan ayrılan mütəxəssis istefasının səbəblərindən danışıb. 44 yaşlı mütəxəssis bildirib ki, "Kəpəz"lə bəzi məsələlərdə fikir ayrılığı yaşanıb: "Bu gün bir yaşam limiti var. Sənin köməkçilərinin əməyinin həmin tələblərdən daha aşağı dəyərləndirilməsi üzücü məqamdır. Bu kimi şeylər məni çox düşündürürdü. Sözümü deyəndən sonra bu, müsbət qarşılanmadı və klubla yollarımızı ayırdıq".

Bağırov yerli mütəxəssislərə göstərilən diqqətin azlığından gileylənib: "Hər bir məşqçi özünə qiymət verməyi bacarmalıdır. Bu gün Azərbaycanda yerli məşqçilərə lazımi qədər diqqət ayrılmır. Bunu aşmaq lazımdır. Çempionatımıza baxanda ilk "üçlük"dəki komandaların baş məşqçiləri məhz yerli mütəxəssislərdir. Düşünürəm ki, biz çox şeyi bacarırıq, sadəcə olaraq bizə daha çox diqqət lazımdır. Əcnəbilərin də gəlməsinə etiraz etmirəm, ancaq dəfələrlə görmüşük xarici mütəxəssislər gəlib qısa müddət çalışıb gediblər. Əvəzində də lazımi kompensasiyanı alıblar. Həmin diqqəti yerli məşqçilərə göstərsəydilər, bəlkə də daha çox uğurlara nail olardılar. Biz də diqqət, qayğı istəyirik".

Qeyd edək ki, Bağırov Azərbaycan çempionatının son turunda "Turan Tovuz"a 0:4 hesabı ilə uduzduqları oyundan sonra keçirilən mətbuat konfransında qarşılıqlı razılıq əsasında Gəncə klubundan ayrıldığını bildirib. "Kəpəz" mövsümü 32 xalla 9-cu pillədə başa vurub və Premyer Liqada qalmağı bacarıb.

Aytac Sahəd
İdman.biz