Report.az
"Araz-Naxçıvan" UEFA Konfrans Liqasının II təsnifat mərhələsində bu gün üz-üzə gələcəyi "Aris"dən (Yunanıstan) üstündür.
Bunu "Report"a açıqlamasında Naxçıvan təmsilçisinin sabiq baş məşqçisi Azər Bağırov deyib.
Mütəxəssis klubun yay fasiləsində yaxşı transferlər həyata keçirdiyini söyləyib:
"Zirə"nin "Hayduk"la qarşılaşması onu göstərdi ki, bütün rəqiblərə qarşı oynamaq olar. Sadəcə, düzgün taktika seçmək lazımdır. Ən önəmlisi komandanı psixoloji cəhətdən qələbəyə hazırlamaqdır. "Aris" barədə düşüncələrim çox yaxşıdır. Bunula yanaşı, "Araz-Naxçıvan"ın da son vaxtlar həyata keçirdiyi transferlər və yoxlama matçları komandanın ciddi hazırlaşdığını göstərir. Fikrimcə, "Araz-Naxçıvan" bu rəqibini keçə bilər. Ən azı Azərbaycanda qələbə qazanmaq mümkündür. Demək olar yay fasiləsində ölkədə ən yaxşı transferləri "Araz-Naxçıvan" həyata keçirdi. Mənə elə gəlir, Naxçıvan komandası daha üstündür".
O, rəqib komandanın transferlərinə toxunub:
"Hər iki tərəf raundu keçmək, zəif tərəflərini gücləndirmək istəyir. "Aris"in transfer etdiyi futbolçuların səviyyəsini bugünkü qarşılaşmada görəcəyik. "Araz-Naxçıvan" hazırlığa daha çox vaxt sərf edib. Əvvəlki heyətən Vadim Abdullayevlə yolları ayırıblar, qalan bütün futbolçuları isə saxlayıblar".
Məşqçi azarkeşlərin sayının az olmasının da oyuna təsir edəcəyini vurğulayıb:
"Azarkeş məsələsi komandanın oyununa təsir edə bilər. Mən və yaxın dostlarım bu gün "Araz-Naxçıvan"ı dəstəkləməyə gedəcəyik. Azarkeşsiz futbol olmur. Komanda "doğma divarlar" arasında oynasa, daha çox dəstək görər. Vaxtilə "Araz-Naxçıvan"da çalışanda bunu görmüşəm".
Qeyd edək ki, "Araz-Naxçıvan" - "Aris" görüşü bu gün, saat 20:00-da "Dalğa Arena"da start götürəcək.
