Ayxan Hüseynov: Hazırlıq, Rəqabət və Azarkeşlər Haqqında

"Yaxşı təlim-məşq toplanışı keçirdik, fiziki və taktiki cəhətdən komandanın gücləndiyini düşünürəm".

İdman.biz xəbər verir ki, bu sözləri Futbolinfo.az-a açıqlamasında "Turan Tovuz"un futbolçusu Ayxan Hüseynov deyib.

26 yaşlı yarımmüdafiəçi hazırlıq dönəmində əsas məqsədin nəticə qazanmaq yox, kollektivin formalaşması olduğunu vurğulayıb: "Təlim-məşq toplanışında əsas nəticə deyildi. Bizə yeni oyunçular gəldi və bir-birimizi başa düşmək bizim üçün daha vacib idi. Qol vura biləcəyimiz çox gözəl anlarımız oldu, amma bəxtimiz çatmadı. Əminəm ki, çempionatda fərqli olacaq".

Hüseynov həmçinin hazırlıq oyunlarında fərdi çıxışına da toxunub və diqqətini mövsümün önəminə yönəldib: "Təlim-məşq toplanışlarında həmişə daha yaxşı oluram, amma əsas odur ki, çempionatda bunu qoruyaq. Baş məşqçi taktika ilə bağlı çoxlu məsləhətlər verir və bu normaldır, çünki böyümək üçün hələ yerimiz var".

Ayxan rəqabətin artmasının onu daha da motivasiya etdiyini bildirib: "Bu il daha çox rəqabət olacaq, amma bu yaxşıdır, çünki mənə daha güclü olmaq və komandanın nəticə əldə etməsinə kömək etmək üçün daha çox motivasiya verir".

O, son olaraq azarkeşlərin roluna xüsusi toxunub və onların komanda üçün nə qədər önəmli olduğunu dilə gətirib: "Azarkeşlərimiz 12-ci oyunçudur və onlar həmişə bizə kömək edirlər, onları hər zaman ruhlandırmaq istəyirik, İnşallah bu mövsümdə də həmişəki kimi dəstəyimiz olacaqlar".

İdman.biz