Idman.biz
"İstəyərdim ki, xal qazanaq. Bu mövsüm "Sabah"la oyunlarımız mübarizəli keçirdi. Rəqib bu il bizə qalib gəlməmişdi. Bu gün bacardılar".
İdman.biz xəbər verir ki, bunu Şamaxı"nın baş məşqçisi Ayxan Abbasov "Sabah"la oyundan sonra keçirilən mətbuat konfransında deyib.
Təcrübəli mütəxəssis Misli Premyer Liqasının 34-cü turunda səfərdə 1:2 hesablı məğlubiyyəti şərh edib: "Standart vəziyyətlərdə uduzduq. Gənc futbolçulara şans verdik. Heyətdə dəyişikliklər etmişdim. Bəzi oyunçuları meydanda görmək istəyirdim. Buna baxmayaraq futbolçularıma ilboyu göstərdikləri mübarizəyə görə təşəkkür edirəm. "Şamaxı" qarşısına qoyulan məqsədə çatdı. Mövsüm bitəndən sonra gələcək planlar haqda fikirləşəcəyik".
Ayxan Abbasov oyunun hakimi Fərid Hacıyevdən narazı qaldığını etiraf edib: "Fərid Hacıyevdən həmişə narazı olmuşam. Çox danışmaq istəmirəm. Deyirik gəncdirlər, həmişə dəstək oluruq. Top çıxıb, foul verir. Ayıbdır. Uşaqların bu boyda əziyyətini yerə vurur. Həmin hücum korner oldu. Korner də qolla nəticələndi. Neçə epizod oldu ki, sarı vərəqə vermədi. Bundan sadə epizodlarda bizə "sarı" verirlər. Fərid Hacıyev oyunu zəif idarə etdi. Bu hakim bizim oyunlara düşəndə çox zəif idarə edir. Bilmirəm nədən irəli gəlir.
Qeyd edək ki, "Şamaxı" 4 turdan sonra uduzub.
İdman.biz
