Ayxan Abbasov: "Hər xal bizim üçün qızıl olacaq"

"Şamaxı" səfərdə "Zirə" üzərində qələbə qazandı. Gərgin keçən 90 dəqiqə sonra "şirlər"in baş məşqçisi Ayxan Abbasov oyun haqqında bunları dedi: 

- Komandamı təbrik edirəm. İlk qələbəmiz idi. Rəhbərliyi, futbolçuları, azarkeşləri təbrik edirəm. Bilirdik ki, "Zirə" üçün çətin olacaq. Çünki ağır oyundan gəlmişdilər. Avrokuboklarda oynayan komandalarımız hələ ki, çempionatda çətinlik çəkirlər. Normaldır. Bu fürsətdən yararlanmaq lazım idi. Yeni futbolçularımız var. Sevindim. Hesab nə olursa-olsun futbolçularım əzmkarlıq göstərdilər, xal qazanmaq üçün mübarizə apardılar. Bu oyunlar bizə lazımdır. Çox oyun olacaq. Hər xal bizim üçün qızıl olacaq. Bu xal da elədir.

-Qələbənizdə "Zirə"nin yorğunluğu rol oynadımı?

- Əzmkarlıq göstərməsəydik işimiz çətin olacaqdı. "Zirə" ustalıq sarıdan bizi üstələyir. Peşəkarlıq təcrübəsindən istifadə etməklə bizə rahat qalib gələ bilərdilər. Sadəcə buna imkan vermədik. İlk yarıdan yaxşı keçirdik. Fasilədən sonra dəyişikliklərdən sonra üstünlük rəqibə keçdi. 

- "Şamaxı"nın bu il məqsədi nədi?

- Bu suala hər dəfə geniş cavab verməyə ehtiyac var.  Digər komandalarda işləyəndə də, bizdə sanki məqsəd istəyirlər ki, nəyisə tez bir zamanda nəticə verəsən, harasa gedəsən. Hədəfimiz çempionatda qalmaq və maksimum yuxarı yerlərdə qərarlaşmaq və ölkə futboluna yeni oyunçular çıxarmaqdı. Bizdə U-21-dən üç futbolçu çıxış edir. 

- Transferlər gözlənilir?

- Pulumuz yoxdur (gülür). Bəzən birdə pul gəlir. Amma hazırda pulsuzuq. 

- "Turan Tovuz"un hazırkı uğurunda nə qədər pay sahibiniz görürsüz?

- Ötən il nə qədər xalımız var idi? Yaxşı başlayıblar. "Turan tovuz" bizim üçün rəqibdir. Bu barədə nəsə demək yersiz olar.  Çempionat hələ qabaqdadır. 

- Qələbə sizin özünüzə stimul verdimi, həmçinin "Qarabağ" – "Turan Tovuz" oyunu barədə nə deyərdiz?

- Klublar iki cəbhədə çətinlik çəkir. Bunu  "Sabah"a da aid etmək olar. "Sumqayıt" da əziyyət çəkdi, sonra toparlandı. Bura inanıb gəlmişəm. Yenidən komanda qurmaq çox çətindir. Məncə, məşqçilikdə ən çətin işlərdən biri seleksiyadır. Daha sonra komandanı inandırmaq lazımdır. Hər qələbə bütün komanda və mənim üçün böyük stimuldur. "Zirə"ni səfərdə məğlub etmək asan  məsələ deyil. "Zirə" keçən il çox möhkəm komanda idi. Həm Kubokun finalında oynadı, həm də gümüş medallara yiyələndi. Avrokuboklarda son oyunu çıxsaq, məncə, təcrübə çatmadı. Amma bu il "Zirə" çox yaxşı çıxış etdi. "Zirə"nin seleksiyasına baxsaq, "Qarabağ"a başağrısı olacaq. Məğlubiyyətlər bəzən qaçılmazdır. Belə komandanı məğlubiyyət bizim üçün stimuldur.