Ayxan Abbasov: “Ola bilər gələcəkdə mən haqlı çıxacam”

"Hər işdə bir xeyir var".

Bunu "İdman Bizdə"nin qonağı olan "Şamaxı"nın baş məşqçisi Ayxan Abbasov deyib.

42 yaşlı mütəxəssis bildirib ki, "Turan Tovuz" dəftərini artıq bağlayıb və geriyə boylanmır: "Gördüyüm işin davamını sona gətirmək istəyərdim. "Sumqayıt" başqadır. Orda sonluqlar oldu. Çünki bu kluba gedəndə fikirlər var idi ki, yerli oyunçularla nəticə qazanmaq olmaz. Baş məşqçi təyin oldunduğum zaman komandanın iddiası artdı, avrokuboklara vəsiqə qazandı, kubokun finalında oynadıq. "Neftçi", "Qarabağ" kimi klubları məğlub etdik. Ondan sonra ayrıldıq. Komandaya legionerlərin transfer olunmasına icazə verildi. Bu gün görürük ki, yeni bir stadionları var. Onlar üçün sevinirəm. "Turan Tovuz"da isə hər şey başqa idi. Kluba dəvət olunanda çətin durum idi. Komandanın büdcə bilinmirdi. Buna risk etdik. Əsas məqsədimiz yaxşı bünövrə qoymaq idi. Bunu artıqlaması ilə etdik. Qışda artıq komanda Premyer Liqada qalmağı təmin etmişdi. Hətta Avropa zonası uğrunda mübarizə aparırdıq. Sonradan kluba qarşı olan hakim haqsızlıqları, zədəlilərin artması nəticələrimizə təsir etdi. Belə çətinliklərlə klubu yaxşı duruma gətirmişdik. Ayrılığımız qismətdir. Tovuz dəftərini bağlamışıq və tam olaraq "Şamaxı"dakı işə köklənmişik".

Abbasov "Şamaxı"ya özünü sübut etmək üçün gəlmədiyini də vurğulayıb: "Deyirlər ki, yeni komandadır, Ayxan Abbasov özünü yenidən sübut etməlidir. Bu fikirlərlə razı deyiləm. Belə çıxır ki, yerli məşqçilər karyeralarının sonuna qədər özünü sübut etməlidir? Təəssüf ki, çempionatımızda özünü sübut etməyən çoxlu sayda əcnəbi məşqçilər var. Biz "Turan Tvuz"da işə tamam başqa cür yanaşırdıq. Əsas komandanın nəticəsi ilə yanaşı, klubun formalaşmasına fikir verirdik. Proyektlər var idi. Addım-addım irəliləyirdik. Klub rəhbərliyi tərəfindən 3 illik plan hazırlanmışdı. Buna mən də razı oldum. Məqsəd 3 ildə güclü komanda yaratmaq və ildən-ilə inkişaf etmək idi. Buna nail olduq. 1-ci ildə hansısa əcnəbini çətinliklə gətirirdiksə, ötən mövsüm həm İspaniyadan, həm Braziliyadan transferlər etdik. O futbolçular klubun 1 il əvvəlki oyunlarına baxıb rahat gəlirdilər. Bu il "Şamaxı"ya gəlmək üçün bir çox oyunçuya təklif göndərmişik, amma onlar tərəddüd edirlər. Tovuzda artıq bu belə deyildi. Həm əsas komanda, həm də klubun formalaşdırılması üçün işlər görürdüm. Amma sonu belə oldu. İnciklik yoxdur, peşəkar kimi klubdan ayrıldım. Ola bilər gələcəkdə onlar, yaxud da mən haqlı çıxacam. Bunu zaman göstərəcək".