Idman.biz
"Şamaxı" klubunun və Azərbaycanın U-21 yığmasının baş məşqçisi Ayxan Abbasov karyerasında daha bir ilk yaşayacaq.
İdman.biz xəbər verir ki, o, DÇ-2026-nın seçmə mərhələsində Ukrayna ilə qarşılaşmada əsas millini baş məşqçi kimi meydana çıxaracaq.
Bu post 44 yaşlı mütəxəssisə ilkin olaraq 1 oyunluq həvalə edilib. Abbasov sabah Ukrayna ilə görüşdə İslandiyaya 0:5 hesablı biabırçı məğlubiyyəti unutdurmağa çalışacaq.
Müvəqqəti baş məşqçinin karyerasına nəzər yetirsək, həm futbolçu, həm də məşqçi kimi böyük yol keçib. Ayxan Abbasov futbola 7 yaşında Buzovna qəsəbəsində idman məktəbində başlayıb. İlk məşqçisi Böyükağa Abbasov olub. Azərbaycanın aşağı yaş (U-17 və U-19) və gənclər yığmalarında oynayıb.
Böyük futbola Buzovna "Xəzri"si ilə gəlib. 1997/98 mövsümündə U-18 komandasında əsas liqada çıxış edib. Sonra 6 ilini "Şəfa" klubunda keçirib, 2002-ci ildə MOİK-də icarədə olub.
2004-2005-ci illərdə "Turan"da, 2006-2007-ci illərdə "İnter"də oynayıb. Növbəti mövsümə "MKT-Araz"da başlayıb. İmişli təmsilçisinin UEFA Kubokunda uğursuzluğundan sonra klub prezidenti komandanı buraxıb, Abbasov "Qarabağ"a keçib. Ağdam klubunda 4 il çıxış edən futbolçu 2011/12 mövsümündə "Turan"a qayıdıb və burada karyerasını başa vurub.
O, futbolçu kimi 2 dəfə Azərbaycan kubokunun qalibi (2001-ci ildə "Şəfa", 2009-cu ildə "Qarabağ"la-red) olub.
Abbasov məşqçiliyə "Zirə"də başlayıb. 2015/2016 mövsümündə burada köməkçi kimi çalışan gənc mütəxəssis növbəti 2 ildə komandanın baş məşqçisi olub. O, 2018-2021-ci illərdə "Sumqayıt"ın, 2022-2024-cü illərdə "Turan Tovuz"un "sükanı arxası"nda olub.
Abbasov 2024-cü ildən "Şamaxı"nın baş məşqçisidir və bu mövsümün sonunadək anlaşması var. Eyni zamanda, bu il martın 14-də Azərbaycan U-21 millisinin baş məşqçisi təyin edilib. AFFA onunla 2 illik razılıq əldə edib.
Qeyd edək ki, o, bu postda Fernandu Santuşu əvəzləyəcək. Bu gün portuqaliyalı mütəxəssis AFFA rəhbərliyi ilə qarşılıqlı razılaşma əsasında istefaya göndərilib.
İdman.biz
