Idman.biz
"Xal qazanmaq istəyirdik, buna inanırdıq. Lakin alınmadı".
İdman.Biz bildirir ki, bu sözləri DÇ-2026-nın seçmə oyunları çərçivəsində İslandiya ilə oyundan sonra Azərbaycan yığmasının baş məşqçisi Ayxan Abbasov deyib.
Oyun 2:0 hesabı ilə İslandiyanın xeyrinə qurtarıb.
"Rəqibin gücünü bilirdik. Son oyuna şanslarını saxlamaq üçün motivasiyalı idilər. İslandiya yığması qrupda Ukraynadan daha yaxşı təsir bağışlayır. İkinci hissədə daha yaxşı oynadıq, şanslarımız oldu. Sadə qollar buraxdıq. Bu gün itkilərimiz, həm də yeni oyunçularımız var idi", - Abbasov bildirib.
Baş məşqçi qrupdakı Fransa ilə son oyundan və millidən gözləntilərini də bölüşüb: "Son oyunumuz qalıb, ona hazırlaşacağıq. İki oyuna hazırlaşanda beynimizdə müəyyən fikir var idi. Rüstəmin sarı vərəqə limitinə düşməsi bir az planları pozdu. Heyətdə dəyişiklik olacaq. Duruma baxacağıq. Rəqib Fransadır, onlar haqda danışmağa ehtiyac yoxdur. Mübarizə aparacağıq. Reallıq var ki, qrupdakı rəqiblərin hamısı bizdən güclüdür. Bəlkə də, bunu qəbul etmək istəmirik. Çətin qrupdayıq. Son oyunda da çəkinmədən oynayacağıq.
Ruhdan düşmək lazım deyil. Gənc komandamız var, getdikcə də gəncləşir. İlk məqsəd odur ki, Millətlər Liqasında C Liqasına qayıdaq. Oyunlara bu baxışla yanaşacağıq. Hazır olmaq lazımdır. Millidən indiki məqamda böyük nəticə gözləmək tezdir".
