Sport24.az
Azərbaycan millisinin baş məşqçisi Ayxan Abbasov DÇ-2026-nın seçmə mərhələsində sabah Fransaya qarşı keçirəcəkləri oyundan əvvəl təşkil olunan mətbuat konfransında iştirak etdi. Sport24.az xəbər verir ki, mütəxəssis əvvəlcə görüşlə bağlı fikirlərini bölüşdü…
– Çətin rəqibə qarşı oynayacağıq. Səfərdə də onlara qarşı ağır oyun keçirmişdik. Futbolçularım həmin görüşdə mübarizə aparmışdı. 70 dəqiqəyə qarşı yaxşı oynamışdıq, sonra rəqib təzyiqi artırıb, çətinlik yaşatmışdı. Sabah heyətdə dəyişikliklər ola bilər. Rəqibdə yaxşı gənc oyunçular var. Onlar da şans qazansa, özlərini göstərməyə çalışacaqlar. Bizim də itkilərimiz var. Təəssüf ki, dünən də Toral Bayramov da zədələndi. Lakin meydana çıxacaq futbolçulara inanırıq. Azarkeş dəstəyi olacaq. İnanıram ki, futbolçular yaxşı mübarizə aparacaq. Belə komandayla mübarizə aparmaq özü bir yaxşılığa doğru bir şeydir.
– Seçmə mərhələnin son oyunudur. Sabah nədənsə qorxmamalıyıq. "Avtobus"u kənara qoyub, hücum futbolu oynamağı düşünmürsünüz?
– Fransaya qarşı bütün komandalar çətinlik çəkir. Yanaşmağımıza baxaq, İslandiya ilə iki matç arasında çox fərq var. Ən çox hücum etdiyimiz bundan öncəki İslandiyaya qarşı oyun idi. Qol epizodları da yaratmışdıq. Əvvəl 1-2 epizoda sevinirdiksə, bu matçda 6 real şansımız olmuşdu. Futbolçular da hücum etmək istəyir, rəqibdən çox şey asılıdır. Sabah əsas məqam mübarizə aparmaqdır. Ancaq hücum etmək deyə bir şey yoxdur. Çempionlar Liqasında olan komandalar da həm hücum edir, həm müdafiə olunur. Təəssüf ki, indi biz ancaq müdafiə üzərində dayanırıq. Sabah öz yanaşmamız olacaq.
– Heyətdə itkilər artır. Hazırda sol cinah müdafiəçisi oynaya biləcək tək oyunçu Rüfət Abbasov qalıb. Sabah onun 90 dəqiqə mübarizə aparmağa gücü çatacaq?
– Sol müdafiəçilərin zədələnməsi bizi çətinə saldı. Amma Rüfət debüt oyununda yaxşı çıxış etdi. Axşam heyətlə bağlı qərarımızı verəcəyik.
– Yunis Hüseynov bildirib ki, Ayxan Abbasov "Turan Tovuz" haqda danışmasın…
– Bu mövzulara toxunmayaq. Burda oturmuşamsa, bütün klublar mənimçün eynidir, hamısına hörmətlə yanaşıram. Heç bir kluba hörmətsizlik etməmişəm.
– İlqar Qurbanov köməkçilərinizin sırasında əyləşməsi nə ilə bağlıdır?
– Bütün dünyada belədir. Təəssüf ki, indi nələrsə axtarışındayıq. Qurbanovun öz işi, mənim öz işim var.
– Şahruddin Məhəməddəliyevin cəzası bitib. Sabah ona şans veriləcək?
– Şahruddin birinci qapıçımızdır. Sabah da qapıda o olacaq.
– Toralın durumu necədir?
– Birinci dərəcəli dartılma var. 5-6 gün bərpa keçməlidir.
– Didye Deşam dedi ki, sabah qarşımızda inadkar komanda olacaq. İbrahima Konate də millimizin oyununun onları təəccübləndirdiyini dedi. Sabah nəticə ilə onları təəccübləndirə bilərik?
– Niyə də yox? Futbolda indi hər nəticə olur. Futbolçularımız da inanır. İslandiya ilə matçda qələbəyə köklənmişdik. Qrupumuzda həm İslandiya, həm Ukraynanın şansı var. Başqa qruplara baxanda, demək olar, hər birində zəif kollektivlər var. Bizim qrupda isə daha güclü komandalardır.
– Stadionun dolu olması gözlənilir. Azarkeşlər də ulduz futbolçular görmək istəyir. Sabah fanatlar üçün hansısa sürpriziniz var?
– Klublarımızla da böyük komandalar oynayanda tribunalarda fərq olur. Mübarizə aparmağa çalışacağıq. İnşallah, onları sevindirə bilərik.
– Fransa yığmasında çox dəyişiklik olacaq. Sizinçün prestijli səfər qazanmaq adına fürsət ola bilər…
– Rəqib mundiala vəsiqəni təmin edib. Bilirik ki, gənclərə şans veriləcək. Amma o gənclər də Avropanın top klublarında oynayanlardır. Bizimçün rəqibin fərqi yoxdur, eyni mübarizəmizi aparacağıq.
– Deşam qrupu maksimum nəticə ilə bitirmək istədiklərini deyib. Bəs sizin əsas motivasiyanız nədir?
– Bu komandalar həmişə meydana qələbə üçün çıxır. Motivasiyamız böyük komandalara qarşı mübarizə aparmaq, xalımızı artırmaqdır. Futbolçular belə oyunlarla bərkiyir, böyüyür.
– Əvvəl yerli məşqçi davası edirdik, gəldi. İslandiya ilə oyundan sonra isə hamı deyir ki, material yoxdur, limit ləğv olunub. Millinin məşqçisi kimi materialı necə dəyişəcəksiniz?
– Heyətlə bağlı problemlər yaşayırıq. Millətlər Liqasında itkilərimiz olmasa, yaxşı mübarizə apara bilərik. Qarşıda vaxt var. Futbolçular formada olmalıdır. Formada olmaq üçün də oynamalıdırlar. Milliyə oyunçu hazır gəlməlidir. Onu 3-4 günə hazır etmək olmur. Eyni zamanda seçimlərimiz də olmalıdır. Limitə baxmadan, yerli oyunçular mübarizəni udmalıdırlar. Bu gün 4 hücumçumuz da formada olsa, seçim edə, daha yaxşı ola bilərik. Potensialımız var, amma tam formada deyilik.
