Idman.biz
"Zirə"nin qapıçısı Aydın Bayramovun QOL.az saytına müsahibəsi
- Artıq bir neçə gündür Türkiyə toplanışına başlamısınız. Hazırlıqlar necə keçir, komandada ab-hava necədir?
- Hər şey qaydasındadır. Komandada pozitiv, ailə ab-havası var. Məşqlərdə tam gücümüzlə çalışırıq. Əlimizdən gələni edirik ki, yeni mövsümə ən yaxşı şəkildə hazırlaşaq.
- Yoxlama oyununda "Qarabağ"a 0:4 hesabı ilə uduzdunuz. Rəsmi matç olmasa belə, böyük hesabla uduzmaq komandada gərginlik yaratmır?
- Xeyr, heç bir gərginlik yoxdur. Bu, yoxlama görüşüdür, fasilədən sonra ilk oyunumuz idi. Belə matçlarda nəticə önəmli deyil, əsas komandanın tezliklə formaya düşməsidir.
- Qarşıdan UEFA Konfrans Liqasının oyunları gəlir. Xorvatiya "Hayduk"u ilə matçlardan gözləntiləriniz nədir?
- Futboldur, əvvəlcədən nəsə demək çətindir. Əsas bizim yaxşı hazırlıq keçməyimizdir. "Hayduk" güclü rəqibdir. Bununla belə, qarşıdakı matçlarda maksimum gücümüzü ortaya qoyacağıq.
- Şansları necə dəyərləndirirsiniz?
- 50-nin 50-yə. Rəqib kifayət qədər güclü, təcrübəlidir. İşimiz heç də asan olmayacaq. Bununla belə, indiki məqamda şansları bərabər sayıram.
- Rəqibin oyunlarını izləmisinizmi, əsas üstünlük kimi nələri qeyd edə bilərsiniz?
- Hələ oyunlara var. Qarşıdakı günlərdə məşqçilər korpusu rəqibi analiz edib, bizə lazımi məlumatları çatdıracaqlar. Dediyim kimi, məqsədimiz maksimum gücümüzü meydanda qoymaqdır.
- Suma və Utziqin gedişi gündəmdədir. İki aparıcı futbolçunun yoxluğu Konfrans Liqasında işinizi nə dərəcədə çətinləşdirəcək?
- Həm Utsiq, həm də Suma bizim üçün vacib futbolçulardır. Eyni zamanda şəxsiyyət kimi də çox yaxşı insandırlar. Lakin futbol komanda oyunudur, bir nəfərdən asılı deyil. İnanıram ki, onların mümkün gedişi özünü çox da hiss etdirməyəcək.
- Ötən mövsüm "Zirə"nin "1 nömrə"si idiniz. Legioner limitinin ləğvindən sonra yenə sizi əsas qapıçı kimi görə biləcəyik?
- Bizim komandada rəqabət həmişə var, limit olsa da, olmasa da. Hamımız çalışırıq ki, özümüzü doğruldaq. Bunun üçün əlimizdən gələni edirik. Yekun qərarı məşqçilər korpusu verir. Biz də verilən qərara hörmətlə yanaşırıq. Əsas komandanın yaxşı nəticə göstərməsidir. İstər meydanda, istərsə də meydandan kənarda bunun üçün hər birimiz əlimizdən gələni edirik.
İdman.biz
