Idman.biz
"Qarabağ" UEFA Çempionlar Liqasının əsas mərhələsinin VI turunda Niderland təmsilçisi "Ayaks"ı qəbul edəcək.
Qarşılaşmanın marağını nəzərə alaraq ölkəmizdə çıxış edən "Ayaks"ın yetirməsi olan, hazırda "Karvan-Yevlax"da çıxış edən niderlandlı futbolçusu Şakil Sno teleqraf.az-a müsahibə verib.
29 yaşlı müdafiəçi həm sabiq klubu, həm də Ağdam klubu barədə maraqlı məqamları açıqlayıb.
Həmin müsahibəni təqdim edirik:
- "Qarabağ" - "Ayaks" oyunu ilə bağlı gözləntiləriniz nədir?
- Bu, çox maraqlı qarşılaşma olacaq. Hər iki komanda hücum futbolunu sevir, ona görə meydanda boşluqlar yaranacaq və açıq oyun izləyəcəyik. Nəticə istənilən tərəfə gedə bilər.
- Siz "Ayaks"ın yetirməsisiniz. Bu komanda hansı müsbət cəhətləri ilə Niderland futbolunda seçilir?
- "Ayaks" həmişə cəlbedici futbolu ilə seçilib: topa çox sahib olmaq, hücumameyilli və dominant oyun, hətta bir az da lovğalıq. Mən klubda 11 il keçirmişəm və bu təsirin hələ də oyunumda hiss olunduğunu deyə bilərəm. Son illər səviyyə bir qədər aşağı düşsə də, "Ayaks" Avropanın böyük klublarından biri və Niderlandın ən böyük komandası olaraq qalır.
- Hər iki komandanı yaxşı tanıyırsınız. Hansının qələbə şansı daha yüksəkdir? Hesab proqnozunuz nədir?
- Komandaların səviyyəsi bir-birinə çox yaxındır. "Qarabağ"la bir neçə dəfə oynamışam, güclü komandadır və Avropada özünü sübut edib. "Ayaks" da böyük avrokubok təcrübəsinə malikdir, sadəcə son vaxtlar formaları yaxşı deyil. Əgər yaxşı günlərindən birini gətirsələr, "Qarabağ" üçün çətin olacaq. Məncə, oyun heç-heçə bitəcək.
- Oyunu stadiondan izləyəcəksiniz? Hansı komandaya azarkeşlik edəcəksiniz?
- Niderland televiziyası məni stadiondakı canlı efirə dəvət etmişdi, amma öz məşqimə görə gələ bilmirəm. Mən Mingəçevirdə yaşayıram və Bakı bir qədər uzaqdır. Təbii ki, "Ayaks"a azarkeşlik edəcəyəm.
- Bu oyunla bağlı sizinlə əlaqə saxlayan olubmu?
- Nə "Ayaks", nə də "Qarabağ" tərəfindən mənim oyunla bağlı heç kim əlaqə saxlamayıb. Sadəcə komandadakı uşaqlarla aramızda bir az zarafat var, onlar "Qarabağ"ı, mən isə "Ayaks"ı dəstəkləyirəm.
- "Ayaks"ın baş məşqçisi Fred Grimlə orada olarkən lap əvvəldən birgə işləmisiniz. Yaydan bəri Azərbaycanda olduğunuz üçün Qurban Qurbanovu da müəyyən qədər tanıyırsınız. Hər iki mütəxəssisi necə xarakterizə edərdiniz?
- Bəli, Fred Grimi yaxşı tanıyıram, keçmişdə birlikdə çalışmışıq və münasibətlərimiz əladır. Tez-tez danışmırıq, amma istəsəm, istənilən vaxt zəng edə bilərəm. Hətta bir neçə il oğlu ilə bir komandada oynamışam. Qurban Qurbanovu isə şəxsən tanımıram, amma onun haqqında çox yaxşı sözlər eşitmişəm.
- "Qarabağ"ın 7 xalı, "Ayaks"ın isə 0 xalı var. Bu amil və matçın Bakıda keçirilməsi Azərbaycan təmsilçisinə üstünlük qazandırırmı?
- 7 xal toplamaq və evdə oynamaq "Qarabağ"a üstünlük və böyük inam verir. "Ayaks" hazırda həm Avropada, həm də liqada çətin dövr yaşayır, amma yenə də üç xal üçün sonadək mübarizə aparacaqlarına inanıram. Məncə, Amsterdam klubu buradan xalla dönmək üçün hər şeyini ortaya qoyacaq.
