Idman.biz
Amsterdam təmsilçisi "Ayaks" Çempionlar Liqasının qrup mərhələsində "Qarabağ"la Bakıda keçiriləcək oyuna azarkeş axını barədə məlumat yayıb.
İdman.Biz xəbər verir ki, klubun açıqlamasına əsasən, Tofiq Bəhramov adına Respublika Stadionunun qonaq sektorunda 1443 Niderland azarkeşi yer alacaq. Bu rəqəm "Ajax Life" tərəfindən təsdiqlənib.
Ümumilikdə qonaq azarkeşlər üçün 1970 bilet ayrılıb. Lakin vizanın alınması, uzun məsafə, səfərin bahalı olması və işdən məzuniyyət tələb etməsi səbəbindən sektorun tam dolması əvvəlcədən də gözlənilmirdi. Buna baxmayaraq, 1400-dən çox "Ayaks" fanatı çətin səfər marşrutuna razılıq verərək komandalarını dəstəkləməyə gələcək.
Bu, ötən mövsümlə müqayisədə xeyli artımdır. Həmin vaxt Avropa Liqasının Bakıda baş tutan "Qarabağ" - "Ayaks" oyununa cəmi 450 Amsterdam azarkeşi gəlmişdi.
"Qarabağ" - "Ayaks" qarşılaşması 10 dekabr tarixində keçiriləcək. Matç 21:45-də başlanacaq.
