İdman.biz
Misli Premyer Liqasının XII turu növbəti baş məşqçi istefası ilə əlamətdar olub.
İdman.biz xəbər verir ki, Şahin Diniyevin "Səbail"dən ayrılması maraqlı məqamlarla da diqqət çəkib.
Autsayderin ikinci "qurban"ı
Çempionatın autsayderi "Kəpəz" mövsümdə ikinci qələbəsini qazanıb. Bu dəfə də Gəncə təmsilçisinin qalibiyyəti rəqibdəki istefaya səbəb olub. IX turda Roman Qriqorçuku yola salan "Kəpəz" indi də Diniyevi "Səbail"dən göndərib. Qərblilər öncə 4:3, indi 1:0 hesabına sevinib. Maraqlıdır, görəsən gəncəlilərin uduzmadığı növbəti oyunda "qurban" kim olacaq? "Kəpəz"in növbəti üç turdakı rəqibləri "Sabah", "Araz-Naxçıvan" və "Şamaxı" olacaq. Bu üç komandadan yalnız Naxçıvan klubunda istefa "qoxusu" yoxdur. Digər iki komanda isə autsayder "sillə"si ilə baş məşqçisini itirə bilər.
İstefa "üçbucağ"ı
Misli Premyer Liqasında ümumilikdə mövsümün 4-cü istefası gerçəkləşib. "Kəpəz"in qurbanlarından başqa iki klub baş məşqçisini dəyişib. Öncə qərblilərin özü Adil Şükürovu yola salaraq Azər Bağırovu gətirib. "Neftçi" Qriqorçukla vidalaşdıqdan sonra onu əvəzləyən Samir Abasov da "Sumqayıt"dakı postunu tərk edib. Onu da Vaqif Cavadov əvəzləyib. Maraqlıdır ki, bütün istefalar son 3 pillədə qərarlaşan komandalarda baş verib. "Kəpəz" 10-cu, "Neftçi" 9-cu, "Sumqayıt" 8-ci yerdə olduğu vaxt çalışdırıcısını dəyişmişdisə, "Səbail" də 9-cu yerdəykən belə addım atıb. Görünür ki, son üç pillə istefa "üçbucağ"ına çevrilib.
Nəhsdə qalıb
"Səbail" mövsümdəki 13-cü oyunda baş məşqçisi ilə vidalaşıb. Bakı klubu Premyer Liqada 12, kubokda 1 matça çıxıb. Nəhs rəqəm Diniyev üçün sonuncu olub. Sonuncu həm də mövsümdə 9-cu məğlubiyyət kimi yadda qalıb. 2-si çempionat, 1-i kubokda olmaqla 3 qələbəsi olan komanda 1 heç-heçə edib. 21 qol vuran komanda 22 top buraxıb. Amma bu balansın belə olması kubokda II Liqa təmsilçisi "Dinamo" üzərində 6:0 hesablı qələbə sayəsində mümkün olub.
676 günlük baş məşqçi
Diniyevin "Səbail"ə təyinatı 2022-ci il dekabrın 28-də gerçəkləşib. O, həmin vaxt Mahmud Qurbanovu əvəzləyib. 2022/23 mövsümünün ikinci yarısını iş başında olan mütəxəssis 2023/24 mövsümünü əvvəldən sonadək postunda qalıb. Cari çempionatın 1/3 hissəsi isə onun vidası üçün yetərli olub. Diniyev "Səbail"ın sükanı arxasında 676 gün qalıb.
Cəmi 21 qələbə
Paytaxt təmsilçisi sabiq baş məşqçisinin rəhbərliyi altında 73 matça çıxıb. Cəmi 21 qələbəsi olan komanda 14 heç-heçə edib və 38 dəfə uduzub. 106 qol vuran bakılılar 123 top buraxıblar. Premyer Liqadakı 66 matçda 68 xal yığan "Səbail" 18 qələbə və 14 heç-heçəyə sevinib. Məğlubiyyət sayı isə 34 olub. Çempionatdakı top fərqi 84-114-dür. Kubokdakı 7 qarşılaşma 3 qələbə və 4 məğlubiyyətlə bitib. 22 qol vuran komanda 9 top buraxıb.
Qeyd edək ki, "Səbail" Diniyevsiz ilk oyununa noyabrın 9-da çıxacaq. Bakı klubu evdə "Turan Tovuz"la üz-üzə gələcək.
Vüqar Xeyrullayev
İdman.biz
