Idman.biz
Dünən UEFA Konfrans Liqasının 3-cü təsnifat mərhələsinin cavab oyunları çərçivəsində öz meydanında "Levski"yə 0:2 hesabı ilə uduzan (ilk oyun 0:1) "Sabah" avrokuboklarda mübarizəni dayandırıb.
İdman.biz xəbər verir ki, Azərbaycan millisinin sabiq yarımmüdafiəçisi, tanınmış futbol mütəxəssisi Aslan Kərimov "bayquşlar"ın son oyunu ilə bağlı Fanat.Az-a açıqlama verib.
Onun sözlərinə görə, "Sabah" ilk qolu buraxandan sonra geridönüş etmək çətinləşib: "Oyundan əvvəl də demişdim ki, "Levski" ilə ikinci matçda "Sabah"ın qol imkanları olacaq. Qonaq komandanın cinah oyunçuları sürətli olduqları üçün təmsilçimizin vingerləri birəbir epizodlarda uğur qazana bilmədilər. Rəqib bizim cinah hücumçularının nəsə etməsinə imkan vermədi. İlk qolu buraxandan sonra geridönüş etmək çətin idi. "Sabah" birinci hissədə meydanın mərkəzindəki mübarizəni tam şəkildə uduzmuşdu. Valdas Dambrauskas 5 müdafiəçi ilə oynamağı uyğun saymışdı. Cinah müdafiəçilərimiz önə çıxaraq topu qarşılamaq istəyəndə dərhal arxasına uzun ötürmə edirdilər. Üçüncücü mərkəz müdafiəçimiz isə cinahı sığortalamağa qorxurdu, çünki onun da arxasına mərkəzdən başqa futbolçu "açılacağını" bilirdi. İlk yarıda qeydə alınan belə epizodların birində Stiv Solvet gecikərək sarı vərəqə aldı. Fasiləyə qədər "Sabah"ın əsas problemlərindən biri bu idi. İkinci yarıya fərqli düzümlə çıxsaq da, yenə qonaqlar meydanın mərkəzində üstünlüyü tədricən ələ keçirdilər və məğlubiyyət qaçılmaz oldu. Bəzən topu ələ keçirsək də, bu zonaya nəzarət onlarda idi.
Bəzi məqamlara yenidən diqqət yetirmək lazım gələcək. "Sabah"da pleymeyker mövqeyi ilə bağlı suallar açıq olaraq qalır. Düzdür, elə bir sistemlə oynadılar ki, o sistemdə oyun mərkəzdə top paylayan futbolçudan faydalanmırlar, amma belə bir futbolçuya ehtiyac yenə də var".
İdman.biz
