Idman.biz
"Rəqib keçilməz komanda deyil. Bakıdakı oyunda öz boşluqlarını göstərdi".
İdman.biz xəəbər verir ki, bunu Teleqraf-a açıqlamasında veteran futbolçu Aslan Kərimov Sloveniyada "Selye" və "Sabah" komandaları arasında keçiriləcək UEFA Avropa Liqasının I təsnifat mərhələsinin cavab oyunu barədə danışarkən deyib.
52 yaşlı mütəxəssis əvvəlcə Masazır təmsilçisinin Bakıda 2:3 hesabı ilə məğlub olduğu görüşlə bağlı qənaətindən danışıb.
Onun sözlərinə görə, ilk oyunun ədalətli nəticəsi heç-heçə idi: "İlk matç 2:2 hesablı heç-heçə ilə də bitə bilərdi. Son dəqiqədə buraxdığımız qol bu oyunda işimizi bir az çətinə saldı. Yaxşı rəqibə qarşı oynayacaqlar. Xüsusən, yarımmüdafiə xətti, arxadan oyun quruculuğu "Selye"də ispaniyalı baş məşqçi Albert Rieranın rəhbərliyi altında gözəl alınır. Belə demək mümkündürsə, onlar yarımmüdafiədə çoxluq yaratmağı bacarırlar. İlk oyunda "Sabah"ın problemləri bundan sonra yaranırdı. Çünki istənilən halda meydanın mərkəzində çoxluq yaratmaqla "Sabah"ın müdafiəsinin üstünə daha böyük qüvvə, daha çox oyunçu ilə həmlə edə bilirdilər. Etdikləri həmlələrdən sonra kifayət qədər futbolçuları bu imkanları qola çevirə bilərlər".
Kərimov "bayquşlar"ın mərhələ adlamaq üçün yaxşı fürsətlərinin olduğunu vurğulayıb: "Ən azı standart vəziyyətlər bizim üçün çıxış yollarıdır. Daha sonra bizim cinah oyunçuları rəqibin müdafiə xəttinə təsir göstərə bilirlər. Sürət baxımdan da rəqibin müdafiə xəttini üstələyirlər ki, bu da bizə bir üstünlükdür. İstər-istəməz "Selye" evdə daha öndə oynamalı və daha çox hücum etməli olacaq. Belədə, qapıda o boşluqlar yaranır ki, "bayquşlar" da bundan yararlana bilər. Bir top çox da böyük fərq deyil, geridönüş etmək mümkündür".
Təcrübəli mütəxəssis Sloveniya təmsilçisi qarşısında "Sabah"ın şansını daha az dəyərləndirib: "Ümumi komandaların potensialını götürsək, yenə də oyunun favoriti "Selye" sayılır. Ən azından matça bir top fərqi ilə öndə başlayacaqlar. Düşünürəm ki, şanslar 55/45 faiz "Selye"nin xeyrinədir. Amma bu məsələ heç də həll olunmayacaq dərəcədə problem deyil. Belə oyunlarda "Sabah"ın qol şansı yüzdə-yüz olur. Amma bunun üçün müdafiədə, ələlxüsus meydanın mərkəzində və hücuma meylli oyunçuların aqressivliyi baxımından rəqib kombinasiyalar qurarkən onlara çoxlu sayda pressinq etmək, aqressiv oynamaq lazım gələcək. Bunun öhdəsindən necə gələcəklərini təxmin edə bilmirəm. Öhdəsindən gəldikləri halda, bu oyundan qalibiyyətlə ayrıla bilərlər".
Qeyd edək ki, "Sabah" – "Selye" görüşü eyni adlı stadionda təşkil olunacaq. Bolqarıstanlı hakimlər briqadasının idarə edəcəyi qarşılaşma Bakı vaxtı ilə saat 22:00-da start götürəcək.
İdman.biz
