Sport24.az
"Yoldaşlıq görüşündə əsas məqsəd gənc oyunçuları yoxlamaqdır. Fernandu Santuş istədiyi oyunu ortaya qoymağa çalışacaq. Hələ ki, bu alınmır. Özünəinamı qaytarmaq baxımından Latviya ilə oyunda qələbə qazanmaq vacibdir". Bu sözləri Sport24.az-a açıqlamasında Aslan Kərimov deyib.
Təcrübəli mütəxəssis iyunun 7-də səfərdə Latviya yığması ilə qarşılacaq millimizin oyunundan gözləntilərini açıqlayıb:
"Son on oyunda - nə rəsmi, nə də yoldaşlıq görüşlərinin heç birində qələbə qazana bilmişik. Latviya ilə matçda bunu bacarsaq, futbolçular psixoloji gərginlikdən az da olsa, çıxa bilərlər. Latviyanı Haiti yığması ilə müqayisə etmək düzgün olmazdı. Çünki Haiti Belarus və Latviyadan üstün komandadır. Latviya millisi güc olaraq Belarus yığması kimidir. Oyun üslubunda fərqli ola bilər. Bizə çətinlik yaradan səfərə yollanmaqdır. Uçuşdan sonra oynamaq asan məsələ deyil. Bu baxımından Latviya millisi ilə güclər bərabərləşir. Hazırda oyunçularımızın keyfiyyəti imkan verir ki, onlara qalib gələ bilək. "Qarabağ" və "Sabah"ın milliyə qoşulacaq futbolçularına 2-3 günlük istirahət verilməlidir. Çünki 120 dəqiqəlik final oyunundan sonra qatılırlar. Bəlkə Santuş ilk oyunda bu iki komandanın futbolçularına daha çox istirahət verdi. Bu da bizim gücümüzü nisbətən zəiflədir".
Qeyd edək ki, Azərbaycan millisi iyunun 7-də Riqada Latviya, bundan 3 gün sonra isə Bakıda Macarıstan yığması ilə üz-üzə gələcək.
