Idman.biz
"Sabah" – "Selye" oyunları haqqında danışmaq çətindir. Çünki mövsümə yeni start verilir. Komandalar ilk rəsmi görüşlərinə çıxırlar.
İdman.biz xəbər verir ki, bu sözləri AZƏRTAC-a açıqlamasında AFFA-nın Məşqçilərin maarifləndirmə şöbəsinin müdiri Aslan Kərimov UEFA Avropa Liqasının I təsnifat mərhələsində Sloveniyanın "Selye" komandası ilə qarşılaşacaq "Sabah"ın şanslarını dəyərləndirərkən deyib.
O, Azərbaycan Kubokunun son qalibinin ötən mövsümlə müqayisədə dəyişdiyini bildirib: "Valdas Dambrauskas ilə bundan əvvəlki rusiyalı çalışdırıcı Vasili Berezutski arasında fərq böyükdür. Rəqibə gəlincə, güclü komandadır. Baş məşqçi isə tanınmış ispaniyalı mütəxəssis Albert Rieradır. Onun oyun üslubu yaxşı topa sahib olmaq və kombinasiyalı hücumlar qurmaqdır. Sloveniyada fərdi keyfiyyətləri yüksək olan futbolçular var. Amma "Selye" məğlub edilməyəcək kollektiv də deyil. Şans baxımından rəqibi üstün sayıram. Bu da sadaladığım amillərlə bağlıdır".
Kərimov Azərbaycan təmsilçisinin cinahlarda təhlükəli olduğunu vurğulayıb: "Sabah"ın cinahlarda sürətli hücumçuları var. Bunlardan biri də Xəyal Əliyevdir. Valdas Dambrauskas rəqibi bu mövqedən cəzalandıra bilər. Amma hesab barədə nəsə deyə bilmərəm".
Qeyd edək ki, "Sabah" – "Selye" görüşü bu gün saat 20:00-da "Bank Respublika Arena"da keçiriləcək. Qarşılaşmanı Qazaxıstandan olan hakimlər briqadası idarə edəcək. Cavab matçı bir həftə sonra Sloveniyada təşkil olunacaq.
İdman.biz
