Sport24.az
"Heç kimə sirr deyil ki, oyunun favoriti "Qarabağ"dır. Əlbəttə Ağdam təmsilçisinin də zəif tərəfləri var. "Araz-Naxçıvan" bundan nə qədər istifadə edə biləcək? Bax bu, sual doğurur. Bu gün Qurban Qurbanovun komandasının ən zəif cəhəti standart vəziyyətlərdisə, hücum xətti ölkədə ən güclüdür. "Araz-Naxçıvan" üçün bu məqam başağrı ola bilər". Bu sözləri Sport24.az-a açıqlamasında Aslan Kərimov deyib.
Təcrübəli mütəxəssis ölkə kubokunun yarımfinal mərhələsində keçiriləcək "Araz-Naxçıvan" - "Qarabağ" oyunu ərəfəsində şansları dəyərləndirib:
"Yaxaladıqları şanslardan maksimum yararlana bilsə, "Araz-Naxçıvan" qalib gələ bilər. Unutmayaq ki, naxçıvanlıların heyətində ciddi itkilər də var. Onlar oynasa, bəlkə heç-heçə edə bilərlər, amma düşünmürəm ki, iki oyunun nəticəsinə görə "Qarabağ" məğlub olsun. Kuboku başı üzərinə qaldırmağa ən real namizəd "Qarabağ"dır. Oyunçularının keyfiyyətləri o qədər yüksəkdir ki, onlarla ayaqlaşmaq çətindir. Çempionatın turnir cədvəli bunun bariz nümunəsidir".
Qeyd edək ki, "Araz-Naxçıvan" – "Qarabağ" matçı bu gün saat 17:00-da "Liv Bona Dea Arena"da keçiriləcək.
