Aslan Kərimov: "Bir daha qeyd edirəm ki, fikirlərim təhrif olunub"

"Təəssüf ki, gözləntilərimiz doğrulmadı. "Qarabağ" yenə əlinə düşən qol imkanlarında yararlana bilmədi. Rəqib isə az saylı qol fürsətlərindən maksimum istifadə etməklə iki qol vurdu. Ağdam təmsilçisinin Çempionalr Liqasından kənarda qalmasına qəbul etmək çətindi". Bu sözləri Sport24.az-a açıqlamasında Aslan Kərimov deyib.

Təcrübəli mütəxəssis "Dinamo"nun cavab görüşü üçün seçdiyi taktikanın özünü doğrultduğunu da vurğulayıb: "Rəqib ilk oyunda 3 top fərqiylə qələbə qazandığından bu üstünlüyünü qorumaqda maraqlıydı. Onlar maksimum sıx müdafiə olunmaqla "Qarabağ"ın erkən qol vurmasına imkan verməyib, əks hücumlara bel bağlamışdılar. Bu taktikada da onlarda alındı. "Qarabağ"a gəlincə, onlar ilk dəqiqələrdən rəqibə güclü pressinq tətbiq etməklə maksimum erkən qol və qollar vurmaq istəyirdi. Amma ələ düşən şanslar boşa verildi. Rəqib ilk qolu vurandan sonra ümumi hesab 4:0 oldu. Bu fərqi aradan qaldırmaq isə çox çətindi. Hesab edirəm ki, rəqib hesabı açandan sonra ağdamlılar fasiləyə kimi "status-kvo"nu reallaşdırsaydı, ikinci yarıda geridönüş üçün döyüşmək, ən azı qələbə qazanmaq olar. Amma alınmadı, əvəzində daha bir qol buraxdıq. İstənilən halda bura qədər gəlib çıxdığına görə "Qarabağ"a təşəkkür düşür. Onlara Avropa Liqasının qrupunda uğurlar arzu edirəm".

Yığmamızın sabiq üzvü jurnalistlərin onun fikirlərini təhrif edərək Qurban Qurbanova çatdırması barədə də danışıb: "Dinamo" ilə oyundan bir gün öncə mətbuat konfransında Qurban Qurbanov barəmdə danışdı. Güya mən "Qarabağ"ın "Dinamo" ilə səfərdəki oyununda yorğun olmasını və buna görə uduzduğunu demişəm. Halbuki, bu yalandı. Qurban müəllimin barəmdə dediklərinə görə qınamıram. Çünki fikirlərimi bəzi "jurnalist"lər təhrif edərək yayıb və Qurban müəllimə də məsələ o cür çatıb. Mən heç vaxt "Qarabağ"ın yorğun olmasını, xorvatlarla ilk görüşdə fiziki çəhətdən çatdırmadığını deməmişəm. Əksinə, Zaqrebdəki qarşılaşmadan sonra demişdim ki, Ağdam təmsilçisi üstün, dominant futbol sərgilədi, çox sayda qol imkanları yaxaladı amma yararlana bilmədi. Həmçinin səfərdəki 90 dəqiqədə 2-ci qoldan sonra "komandada mental və psixoloji yorğunluq oldu" demişəm. Çox təəssüflər olsun ki, bəzi media "nümayəndə"ləri dediklərimi düzgün yazmayıb öz ictimaiyyətə yanlış məlumat ötürüblər. Bir daha qeyd edirəm ki, fikirlərim təhrif olunub. Təəssüf ki, qeyri-peşəkarlıqla məşğul olan "jurnalist"lər də var".

Qeyd edək ki, "Qarabağ" həm səfərdə (0:3), həm də evdə (0:2) məğlub olaraq Çempionlar Liqasında mübariznə dayandırıb. 

ABDULLA İSMAYILOĞLU