Sport24.az
"Haiti və Belarusa qarşı oyunların əsas məqsədi bəlli idi. Bu matçlarda qalib gəlmək və ya məğlub olmaq önəm kəsb etmirdi. Bu cür qarşılaşmalarda əsas məqsəd komandanın zəif və üstün tərəflərini müəyyən etməkdir". Bu sözləri Sport24.az saytına açıqlamasında Aslan Kərimov deyib.
Təcrübəli mütəxəssis yığmamızın son yoldaşlıqlıq görüşündə Belarusa məğlub olmasına da münasibət bildirib:
"Bu matçlarda qələbə qazansaydıq belə, seçmə mərhələdəki oyunlarmıza psixoloji cəhətdən təsir edən deyildi. Rəqiblərimiz Fransa, Ukrayna və İslandiya yığmalarına qarşı yaxşı çıxış edə biləcəyimizi demək çətindir. Bu komandalarla başabaş mübarizə aparmaq üçün keyfiyyətimiz çox aşağıdır. Biz ancaq oyunumuzu yaxşılaşdıra bilərik. Belarusla qarşılaşmada Haiti ilə oyunla müqayisədə müdafiədən oynamağa başladıq. Hücumda çoxala bilmirdik. Qol fürsətləri oldu, yararlana bilmədik. Bəlli oyunçular var idi ki, texniki baxımdan milli komandada oynaması tez idi. Fernandu Santuş Zamiqi qorudu. Onun 20 yaşı varsa, U-21 millisində oynamalıdır. A yığmasında ardıcıl iki dəfə belə səhvə yol vermək olmaz. Bəzi futbolçular var ki, milli komandada olmamalıdır. Renat keyfiyyət baxımından bir çox futbolçumuzdan üstün ola bilər, amma xarakter baxımından... Bizim üçün başını topun qabağına qoyan futbolçu lazımdır, mən bunu Renatda görmürəm. Ümid edirəm ki, bundan sonrakı oyunlarda Fernandu Santuş heyətdə daha doğru seçimlər edəcək".
Qeyd edək ki, millimiz son iki yoxlama görüşündə Haitiyə 0:3, Belarusa isə 0:2 hesabı ilə məğlub olub.
