Aslan Kərimov: "Ağdamlılar bu gün ingilislərin ilk təzyiq dalğasına tab gətirsə..."

"Bu gün "Qarabağ" İngiltərədə ağır oyuna çıxır. Oyunun favoriti "Tottenhem olsa da, təmsilçimizin şansının olmadığını söyləmək olmaz. Qurban Qurbanovun komandası avrokuboklarda güclü rəqiblərə qarşı oyunlarda uğurlu nəticə qazanmağı bacarıb". Bu sözü Sport24.az-a açıqlamasında Aslan Kərimov deyib.

Təcrübəli mütəxəssis London klubunun üstün və zəif cəhətlərini sadalamaqla yanaşı, "Qarabağ"a uğur qazanmağın yolunu da göstərib: "Tottenhem"in hazırda ən zəif mövqeyi müdafiə xətdidir. İngiltərə təmsilçisinin "sükanı arxasına" keçən yeni baş məşqçi daha çox meydanın mərkəzində və rəqibə aid hissəsində pressinq tətbiq etməyə üstünlük verir. Bu zaman onların mərkəz müdafiəçiləri belə müəyyən qədər irəli çıxır və birəbir oyuna üstünlük verirlər. İngiltərə klubunun bu taktikasının üstünlüyü ilə yanaşı çatışmazlığı da var. Üstünlüyü odur ki, rəqibi təzyiqdə saxlamağı bacarır. Mənfi tərəfi isə rəqib əks-hücumdan yararlana bilir. Ağdamlılar bu gün ingilislərin ilk təzyiq dalğasına tab gətirsə və sürətli əks həmlələr təşkil edə bilsə, səfərdən istədiyi nəticə ilə dönəcək. Ağdamlıların heyətində start sürəti yaxşı olan Juninyo, Leandro, Elvin kimi oyunçular var. Unutmayaq ki, "Qarabağ" "Bayer" kimi güclü komandanın müdafiəsini yarıb qollar vurub. "Qarabağ" üçün əsas start həyacanını üzərindən atmaqdı. İlk 30 dəqiqədə bunu bacarsa, qalan dəqiqələrdə rahat oynayacaq".

Qeyd edək ki, "Tottenhem" - "Qarabağ" matçının start fiti Bakı vaxtı ilə saat 23:00-da səslənəcək.